Монгол Улсын хүнсний үйлдвэрлэлийн анхдагч “Сүү” хувьцаат компани 2025 оны хувьцаа эзэмшигчдийн ээлжит хурлаа 4 дүгээр сарын 22-ны өдөр амжилттай зохион байгууллаа. Компанийн үйл ажиллагаа, санхүүгийн үзүүлэлт, бизнесийн стратегийн томоохон өөрчлөлт, хөрөнгө оруулалтын төлөвлөгөөг тус хурлын үеэр танилцуулж, холбогдох шийдвэрүүдийг санал хураалтаар баталгаажуулсан байна.

1958 онд үүсгэн байгуулагдсан “Сүү” ХК нь 2006 онд бүрэн хувьчлагдаж, нээлттэй хувьцаат компани болсон бөгөөд өдгөө 13,000 гаруй хувьцаа эзэмшигчтэй, салбарын тэргүүлэгч үйлдвэрлэгч болон төлөвшжээ.

2024 он — Санхүү, үйл ажиллагааны өндөр өсөлт

Тус компани 2024 онд 28.9 сая литр сүүг дотоодоос бэлтгэн авч, дотоодын зах зээл дэх сүү, сүүн бүтээгдэхүүний тэргүүлэгч байр сууриа бэхжүүлсэн бөгөөд 192.4 тэрбум төгрөгийн борлуулалтын орлого, 16 тэрбум төгрөгийн цэвэр ашигтай ажилласан нь компанийн түүхэн дэх хамгийн өндөр гүйцэтгэлд тооцогдож байна.

Хувьцаа эзэмшигчдийн хурлаар санхүүгийн тайлан, Төлөөлөн удирдах зөвлөлийн дүгнэлт, компанийн дүрмийн өөрчлөлт, ногдол ашгийн хуваарилалтын асуудлыг тус тус хэлэлцэн, компанийн засаглалын зарчмыг чанд мөрдөн шийдвэрлэв.

“Suu 2.0” – Хүчин чадлын тэлэлт ба экспортын платформ

Хурлын үеэр танилцуулсан “Suu 2.0” хөтөлбөр нь үйлдвэрлэлийн хүчин чадлыг хоёр дахин нэмэгдүүлэхийн зэрэгцээ бүтээгдэхүүнээ олон улсын зах зээлд гаргах экспортын чадамж бүхий суурь дэд бүтцийг бүрдүүлэх зорилготой юм. Энэхүү стратегийн хөрөнгө оруулалт нь Монголын хүнсний үйлдвэрлэлд технологийн шинэчлэл, логистикийн кластер үүсгэх суурийг тавьж байна.

Ажиллах орчны дижиталчлал, соёлын шинэчлэл

2024 онд шинэ оффисын цогцолбор, ажилчдын цэцэрлэг, фитнес төв, урамшууллын систем зэрэг дотоод дэд бүтцийг өргөтгөсөн нь байгууллагын соёл, ажилтны сэтгэл ханамж, бүтээмжид шууд эерэг нөлөө үзүүлж буй. “Сүү” ХК нь хүний нөөцийн бодлогоо дижиталчлал, ажиллах орчны шинэчлэлд суурилан стратегийн түвшинд ахиулж байна.

Инновацад суурилсан бүтээгдэхүүн хөгжүүлэлт

Компанийн R&D багийн хэрэгжүүлсэн бүтээгдэхүүн хөгжүүлэлтийн хүрээнд “Fit” пробиотик цуврал, “Suuper сүү”, “Амтлаг” хөлдөөсөн тараг зэрэг хэрэгцээ, хэрэглээнд суурилсан шинэ бүтээгдэхүүнүүдийг зах зээлд амжилттай нэвтрүүлж, хэрэглэгчдийн сегментэд оновчтой байр суурь эзэлж чадсан.