Халдварт өвчин судлалын үндэсний төвөөс менингококкт халдварын нөхцөл байдлын талаар мэдээлэл өгч байна.

ЭМЯ-ны Нийгмийн эрүүл мэндийн бодлогын газрын дарга Л.Баттөр "Өнгөрсөн оны төгсгөлд таван сэжигтэй тохиолдол байснаас он гарсаар хоёр тохиолдол нь батлагдсан. Энэ хоёр тохиолдол эмчлэгдээд бүрэн эдгэрсэн. Нэг тохиолдол нь богино хугацаанд хурдацтайгаар хүндэрсэн тул харамсалтайгаар эндсэнийг мэдээлсэн.

Одоогоор Нийслэлийн нутаг дэвсгэрт менингококкт халдварын хоёр сэжигтэй тохиолдол илэрсэн. Баянгол дүүргийн сэжигтэй тохиолдлын хувьд 12 сарын 18-наас хойш хичээлдээ яваагүй хүүхэд буй. Гэртээ өөрийгөө тусгаарласан байдалтай байна.

Баянзүрх дүүргийн 311 дүгээр цэцэрлэгт менингококкт халдварын сэжигтэй тохиолдол илэрсэн бөгөөд ажиглаж байна.

Шинэ цэцэрлэг тул тухайн хүүхэдтэй хамт есөн хүүхэд байсан. Одоогоор хүүхдүүдийг гэрээр нь тусгаарлаад буй. Хүүхдүүдэд ямар нэгэн шинж тэмдэг илэрсэн зүйлгүй. 

Тухайн цэцэрлэгт ариутгал, халдваргүйтгэлийг бүрэн хийсэн. Халдварт судлалын үндэсний төвийнхөн энэ сэжигтэй тохиолдол дээр тандалтыг үргэлжлүүлж буй.

Олон нийтийн сүлжээнд нийтлэгдсэн есөн настай хүүхдийн эндэгдэл ХӨСҮТ-д бүртгэгдээгүй. Менингококкт халдвар авсан гэдэг нь ташаа мэдээлэл болохыг мэдэгдэж байна.

Ийм олон нийтийн сүлжээнд батлагдаагүй мэдээлэл тарааж, иргэд олон нийтийг айдаст автуулахгүй байхыг хүсэж байна.

Монголд анх удаа менингококкт халдвар гарч байгаа юм биш. Жил бүр энэ халдвараар 3-4 тохиолдол бүртгэгддэг. Голомтот газруудад гарч байдаг юм.

Маш хүнд хэлбэрээр өвдсөн тохиолдолд амь насанд хүрэх эрсдэлтэй. Түүнээс энэ халдвараар өвчилсөн хүн бүрд үхлийн аюул тохиолдоно гэсэн зүйл байхгүй. Нийт тохиолдлын 13 хүртэлх хувьд л амь нас эрстэх магадлалтай.

Менингококкт нь бусад төрлийн халдварт өвчинтэй жишихэд тархах эрсдэл нь харьцангуй бага. Энэ халдварын эрсдэл нь халуун амьсгалаар халддаг онцлогтой буюу нэг метрийн зайд, ойроос харилцах тохиолдолд халддаг.

Томуу төст өвчний халдвартай нэг хүн танхимд орж ирэхэд бүгд халдварлах эрсдэлтэй байдаг шиг тархалтгүй гэсэн үг. Өөрөөр хэлбэл их ойроос тулж харьцахад халдвар дамждаг.

Тиймээс халдвар хамгааллын энгийн алхмуудыг мөрдөх хэрэгтэй. Гадуур явахдаа амны хаалт зүүх, гараа бохирдсон даруйд угаах хэрэгтэй. Мөн даарахгүй байх нь чухал тул малгай, ороолт, бээлийг сайн өмсөх нь чухал.

Эцэг эхчүүд гадуур явж ирээд хүүхдэд халдвар өгөх эрсдэл өндөр тул гаднаас орж ирээд гарыг сайтар угааж, хамар, хоолой залгиурын эрхтнээ зайлж цэвэрлэсний дараа хүүхэдтэй хавьтал болох нь чухал" гэв.

ХӨСҮТ: Менингококкийн халдвар тархлаа гээд ХӨСҮТ-өөс карентин зарлахгүй. Налайх дүүргийн цэцэрлэг сургуулийн хүүхдүүдийн хувьд эрсдэл өндөртэй байсан. Тус өвчлөлөөр амиа алдсан хүүхэд эмнэлэгт очиж, эмчилгээнд орох хүртэл хугацаа алдсан учир ойрын хавьтал болох сургууль цэцэрлэгийн үйл ажиллагааг цахимд шилжүүлсэн. Мөн Налайх дүүргийн удирдлагаас цахимаар хичээллүүлэх санал хүргүүлж ажилласан" гэлээ.