Энэ жилийн “Алдрын од” одонг "Харанга" хамтлаг хүртэхээр болсонтой холбогдуулан долоодугаар сарын 30-ны 21:00 цагаас тус хамтлагт хүндэтгэл үзүүлэх “Алдрын хүндэтгэл” шоу тоглолт  Их эзэн Чингис хааны нэрэмжит талбайд болно.

Харин тухайн өдрийн 13:00 цагт тус хамтлагийн гишүүдэд “Алдрын Од” одонг гардуулж өгөх юм. 

Тоглолтыг Нийслэлийн Соёл урлагийн газар хариуцан зохион байгуулж, ерөнхий найруулагчаар хөгжмийн зохиолч, хөгжмийн найруулагч, продюсер Н.Халиун ажиллаж байна.

Тоглолтын үеэр "Харанга" хамтлаг өөрсдийн  сор болсон уран бүтээлүүдээ толилуулахаас гадна рок попын уран бүтээлчид "Харанга" хамтлагт хүндэтгэл үзүүлж тоглолтод оролцоно.

“Найрсаг Улаанбаатар” хөтөлбөрийн хүрээнд нийслэлийн Засаг даргын санаачилгаар Монголын pок попын хөгжилд үнэтэй хувь нэмэр оруулсан хамтлаг, дуучдыг алдаршуулах зорилгоор “Алдрын Од” одонгоор шагнаж, “Алдрын од" гардуулах ёслолыг жил бүрийн долоодугаар сарын 30-ны өдөр зохион байгуулахаар шийдвэрлэсэн гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.