Нээлттэй сонгон шалгаруулалтыг Монгол Улсын Засгийн газрын Хэрэг эрхлэх газар, “Шинэ сэргэлтийн хурдасгуур” төрийн өмчит байгууллага, Монголын Үндэсний Худалдаа Аж Үйлдвэрийн Танхим, их дээд сургуулиудын багш нар, хуульчид, иргэний нийгмийн байгууллага болон иргэдийн төлөөллөөс бүрдсэн ажлын хэсэг зохион байгуулж байгаа болно. 

Уг үйл ажиллагаанд хөндлөнгийн шинжээчээр ЗГХЭГ-ын Тэргүүн дэд даргаар ахлуулсан ажлын хэсэг, Хүний нөөц, менежментийн чиглэлийн Төрийн бус байгууллага, иргэдийн төлөөллөөс бүрдсэн баг хяналт тавин ажиллаж байна. 

Шалгаруулалтын эхний үе шатны “сорил-тест”-ийн шалгалтыг Төрийн албан зөвлөлөөр ахлуулсан ажлын хэсэг 2023 оны 1 дүгээр сарын 26, 27-ны өдрүүдэд зохион байгууллаа.  

Хоёр дахь шатны шалгаруулалт болох эхний шатанд тэнцсэн оролцогчидтой хийх ярилцлагыг 2023 оны 1 дүгээр сарын 30, 31-ний өдрүүдэд зохион байгуулна. Уг ярилцлагыг мэргэжлийн бөгөөд олон нийтэд хүлээн зөвшөөрөгдсөн эрдэмтэн, судлаачдаас бүрдсэн ажлын хэсэг хийх ба Төрийн албаны зөвлөлийн жишиг тест болон олон улсын стандартад нийцсэн аргачлалаар шалгаруулах юм.  

Сонгон шалгаруулалтын төгсгөлд хоёр шатны шалгалтын нийлбэр дүнгээр хамгийн өндөр оноо авсан нэр дэвшигчдийг “Эрдэнэс Монгол” ХХК-ийн Гүйцэтгэх удирдлага сонгогдсон албан тушаалд томилох болно.

Гэтэл зарим хэвлэл мэдээллийн хэрэгслээр “эцсийн сонгон шалгаруулалтыг гүйцэтгэх удирдлага шийднэ” гэсэн ташаа мэдээлэл цацагдсан байна. Иймд сонгон шалгаруулалтад бүртгүүлсэн иргэд худал ташаа мэдээлэлд авталгүй шалгалтандаа идэвхитэй оролцохыг уриаллаа.   

"Шинэ сэргэлтийн хурдасгуур" байгууллагын захирал Б.Дөлгөөн дараах мэдээллийг өгөв. Эрдэнэ Монгол ХХК-ийн ажлын байрны нээлттэй сонгон шалгаруулалтад давхардсан тоогоор 3544 иргэн анкетаа илгээсэн. Үүнээс жолооч болон үйлчлэгчийн ажлын байранд 80 анкетийг тусад нь шалгаруулсан.

Шалгалтын тестийг боловсруулахад маш олон талын оролцоог хангасан. Нийт 70 асуултын 40 нь хүний ур чадварт үнэлж авч байгаа. Шалгалтын материал задрах ямар ч боломжгүй. Учир нь шалгалтын бүх материалыг багш нар л зөвхөн мэдэж байгаа бөгөөд бүх багш нартай нууцлалын гэрээ байгуулсан. 

Мөн Төрийн албаны зөвлөлийн гишүүн н.Баатарсайхан: Өчигдөр таван ээлжээр 955 иргэн шалгалтад орох байсан ч 589 иргэн шалгалтад орсон. Үлдсэн иргэд хувийн зохион байгуулалтын улмаас хожигдсон, хоцорсон, сайн дураараа ирээгүй гэх шалтгаанууд байсан. 

Харин өнөөдөр 1129 иргэн шалгалтад орох ёстой. Эхний дөрвөн ээлжийн байдлаар үзвэл 498 иргэн шалгалтад орсон байна. Шалгалтад авах ёстой хамгийн өндөр оноо 70 байх ёстой. Шалгалт өгсөн иргэн хамгийн өндөр буюу 61 оноо бол хамгийн бага нь 11 оноо авсан байна. Шалгалтад оролцсон иргэдийн дундаж оноо 40. Ирц 50 хувьд хүрсэн. 

Монголын хүний нөөцийн удирдлага шинэчлэлийн академийн дэд захирал н.Баянжаргал, сонгон шалгаруулалт өнгөрсөн долоо хоногийн өмнөөс эхэлсэн. Шалгалт маш өндөр зохион байгуулалттай явж байна. Одоогийн байдлаар ямар нэгэн зөрчил илрээгүй. Харин хүний өөрийн хариуцлагагүй байдал, хандлагын асуудал байна. Тодруулбал ахлах менежерийн түвшинд ажил горилж анкет бөглөсөн мөртлөө, шалгалтын цагаас хоцорч ирэх, ирэхгүй байх зэрэг асуудал гарч байна. Энэ бол хувь хүний хандлага, хариуцлагын асуудал. Бусдаар зохион байгуулалтын үйл явц маш өндөр зохион байгуулалт дор явагдаж байна.