Баянгол дүүрэг могой жилд хийж бүтээсэн ажлаараа шилдгийн шилдгийг шалгаруулах “Алтан дэлхий” ёслолын үйл ажиллагаанд нэр дэвшин оролцжээ.

Шилдгийг тодруулах энэхүү үйл ажиллагаа өнгөрсөн баасан гаригт болсон бөгөөд нүдэнд харагдахуйц хөрөнгө оруулалт, бүтээн байгуулалт болон олон нийтийн санал асуулгаар Баянгол дүүрэг “Шилдэг дүүрэг” номинацид шалгарч, алтан цомын эзэн болов.

Өнгөрсөн 2013 онд Баянгол дүүрэгт 103.6 тэрбум төгрөгийн хөрөнгө оруулалт хийж, зам харилцаагаа шинэчлэх, сургууль, цэцэрлэг өргөтгөх, гэрэлтүүлэг, ногоон байгууламжаа нэмэгдүүлэх зэрэг томоохон бүтээн байгуулалт хийжээ.

Дүүргийн Засаг даргын 2013-2016 оны үйл ажиллагааны мөрийн хөтөлбөрт Агаар цэвэр, Аюулгүй амгалан, Амины сууцтай, Ажилтай орлоготой, Авлигагүй дүүрэг гэсэн таван дэд зорилт, 72 заалт бүхий 230 үйл ажиллагааг төлөвлөн хэрэгжүүлж эхэлсний 90.1 хувийн гүйцэтгэсэн бөгөөд цаашид ч энэ эрчээрээ ажиллана гэдгээ дүүргийн удирдлага илэрхийлсэн байна.