Хүүхдүүд ээ, та нар "Нугасны муухай дэгдээхэй" гэдэг үлгэрийг мэдэх үү. Нугасны гэр бүлд нэгэн том биетэй, бусдаас тэс өөр царай муутай амьтан мэндэлснээр хэрэг мандана. Харсан бүхэн цочин гайхшрах тэр бүрзгэр дэгдээхэй өөрийгөө хэн гэдгийг үл мэднэ. Аав, ээж, ах дүү гээд харсан бүхэн түүнийг шоолж, хажуугаасаа хөөх нь түүнийг өөртөө итгэх итгэлгүй болгодог юм. Нэгэнт бусдад ад үзэгдэж ганцаардсан царай муут өөрийн хамаатан саднаа хайж буйгаар үлгэр үргэлжилнэ. Гэвч түүнтэй ижил амьтан энэ ертөнцөд байдаг ч үгүй бололтой.

Хаачихаа мэдэхээ байсан бяцхан дэгдээхэй нуурын эрэгт уйлж суугаад хачин үзэсгэлэнтэй нэгэн шувууг харсан нь түүний хамаатан байж таардаг. Угтаа нугасны гэр бүлийг цочоосон муухай царайтай амьтан цасан цагаан хунгийн дэгдээхэй гэдгээ мэдэж буйгаар үлгэр амар сайхандаа жаргадаг.

Та бүхний амралтад зориулан Хүүхэлдэйн театрын ах, эгч нар нь Хайнс Кристианс Андерсоны "Нугасны муухай дэгдээхэй" жүжгийг зориулж байна.

Энэхүү жүжгийг зохиогчийнх нь мэндэлсний 205 жилийн ойд зориулан өнгөрсөн жил тайзнаа амилуулсан билээ. Энэхүү уран бүтээлээрээ өнөөгийн нийгэмд байгаа эмзэг бүлгийн хүүхдүүдэд нугасны муухай дэгдээхэй дараа нь хун болдог шиг тэднийг сайхан ирээдүй хүлээж байгаа гэдгийг харуулахыг зорьжээ.

Уран бүтээлчид "Нугасны муухай дэгдээхэй" зохиолоо бүтэн таягт хүүхэлдэйн төрлөөр тавих юм. Зохиолд гол дүрийн 12 жүжигчнээс гадна театрын 30, гэрээгээр 20 гаруй уран бүтээлч тоглож байгаа аж.

Жүжгийн найруулагчаар Б.Сүхээ, хөгжмийн зохиолчоор төрийн соёрхолт Б. Мөнхболд, аранжировкоор мастер Байдраг нар ажилласан байна. Жүжгийн тасалбарын үнэ 2500 төгрөг. Аав, ээжийгээ дагуулаад           "Хунгийн дэгдээхэй"-г 14 цагаас театрын тайзнаас үзээрэй.

Ж.Жаргал