ЭМЯ-наас мэдээлж байна. 

ХӨСҮТ-ийн ерөнхий захирал Д.Нямхүү, Истанбулын онгоцоор ирсэн нэг иргэний давтан шинжилгээгээр  COVID-19 ИЛЭРЛЭЭ. Ингээд Монголд коронавирусийн батлагдсан 12 дахь тохиолдол бүртгэгдлээ. Токио-УБ-ын онгоцоор ирсэн 100 хүний шинжилгээгээр коронавирус ИЛРЭЭГҮЙ. Ингээд Токио-УБ-ын онгоцоор ирсэн 206 хүнийг шинжилж, хянаж дуусгалаа. Ер нь тусгай үүргийн 4 удаагийн нислэгээр ирсэн иргэдийг бүрэн шинжилгээнд хамруулж дууслаа. Гэсэн ч хяналт үүгээр дуусахгүй тусгаарлан ажиглалтад иргэд 21 хоног болно. Шаардлагатай бол дахин шинжилгээ хийж, хянана. Эмч нар анхаарал сулруулахгүй ажиллах ёстой.

2020 оны гуравдугаар сарын 26-нд ХӨСҮТ, Сэлэнгэ, Дархан-Уул аймагт тусгаарлагдсан тус бүр хоёр, нийт зургаан иргэний шинжилгээнд СOVID-19 илрээгүй. Гуравдугаар сарын 27-нд Сэлэнгэ аймагт халдварын сэжигтэй таван хүн тусгаарлагдаж, тандалт судалгаа шинжилгээ хийж байна. Өнөөдөр ХӨСҮТ-д 220 хүн тусгаарлагдаад байна.

ЭМЯ-ны Шуурхай удирдлагын газрын дарга Д.Нарангэрэл, Дэлхийн 30 гаруй орны эрүүл мэндийн сайд нар болон 500 гаруй мэргэжилтнүүд оролцсон коронавирусийн халдварын талаарх цахим хурлыг ДЭМБ-аас зохион байгууллаа. Хурлаар БНХАУ-ын Ухань хот, Япон, Солонгос, Сингапур улс COVID-19 халдвартай тэмцэх чиглэлээр авсан арга хэмжээ, сургамжыг улс орнуудтай хуваалцлаа.

Манай улсын хэрэгжүүлж буй арга хэмжээ бусад улс орнуудынхтай таарч байна. харин нэг өвөрмөц зүйл бол клиникийн хөнгөн өвчтөн 14 хоногоос дээш, хүнд өвчтөн 6-7 долоо хоногоос дээш хугацаагаар эмнэлэгт хэвтэн эмчлүүлж байна. Эрт илрүүлэх, тусгаарлах, шинжлэх, эмчлэх гэсэн шатаар улс орнууд ажиллаж байна. ДЭМБ-аас 12-16 сарын дараа COVID-19-ийн вакцин гарна гэж мэдээллээ.

Я.Буянжаргал, Улсын хэмжээнд 3837 иргэнээс 2390 иргэн тусгаарлагдаж байна. 320 эмч, мэргэжилтэн мөн тусгаарлагдан үйлчилгээ үзүүлж байна. Галт тэргэнд Төмөр замын эмнэлгийн эмч, мэргэжилтнүүд зорчигчдод тусламж үзүүлж байна.

Улсын хэмжээнд 52274 эмч, мэргэжилтнүүд иргэдэд тусламж үзүүлж байна. Онлайнаар хичээлээ хийж буй орон нутгийн оюутнууд орон нутгийнхаа эмнэлэгт тусламж үзүүлэх саналаа гаргасан. Жишээлбэл, Сувилахуйн сургуулийн 1200 оюутан ирэх даваа гарагаас эхлэн орон нутгийнхаа эрүүл мэндийн байгууллагуудад тусалж ажиллахаар боллоо.

ЭМЯ-ны Гадаад харилцаа, хамтын ажиллагааны газрын дарга Б.Янжмаа, Италид өнгөрсөн 24 цагт хамгийн олон буюу 919, Испанид 769 хүн нас барлаа. Италид эрүүл мэндийн ажилтнуудыг 8.4 хувь, Испанид 16.5 хувь нь халдвар авч байна. БНХАУ-д сүүлийн өдрүүдэд шинэ халдварын дийлэнх нь гадаадаас зөөвөрлөгдөн ирж буй тул өнөөдрөөс эхлэн гадаадын иргэдийг хүлээн авахгүйгээр шийдвэрлэлээ. Энэ хоригт нисэх багийнхан болон дипломат ажилтнууд хамаарахгүй юм байна.