Дуучин, рэппер, бизнес эрхлэгч Akon буюу Алиам Дамала Бадара Акон Тиам өөрийн хотыг барихаар болсон тухай мэдээлэл гараад хоёр жил болжээ.

Тэгвэл крипто валютаар арилжаа хийх уг “Эйкон хот”-ыг 6 тэрбум ам.доллараар хийхээр гэрээ байгуулжээ.

Эйкон анх 2018 онд ирээдүйн “Крипто хот” барих тухай төслөө олонд танилцуулж, тухайн хотод зөвхөн "Akoin" гэх крипто валютаар арилжаа хийнэ хэмээн ярьж байв.

Түүний хэлснээр Сенегалын Ерөнхийлөгч Маки Саллын түүнд бэлэглэсэн 8 км/кв газарт шинэ хотоо барих бөгөөд “Akon City” хэмээн нэрлэх юм. Шинэ хот Сенегалын нийслэл Дакар хотын шинэ нисэх онгоцны буудлаас 5 минут явах зайтай байрлах аж.

“Lonely”, “Oh Africa”, “Locked up” зэрэг дуугаараа алдартай Эйкон рэппер гэхээсээ илүү бизнес эрхлэгч юм. Түүний хамгийн сүүлд хийсэн ажил нь улс төрч, олон улсын бизнес эрхлэгч Тион Ниан, Африкийн "ADS" группийг үүсгэн байгуулагч, сэргээгдэх эрчим хүчний “Solektra” компанийн гүйцэтгэх захирал Самба Батили нартай хамтран эхлүүлсэн “Akon Lighting Africa” төсөл билээ.

2014 оноос эхэлсэн уг төсөл нь Африкийг нарны цахилгаан эрчим хүчээр хангах зорилготой бөгөөд эхний ээлжид Африкийн 14 оронд өөрийгөө нарны эрчим хүчээр цэнэглэх чадвартай 13 мянган ширхэг гудамжны гэрэл суурилуулжээ.

Тэдний энэхүү төслийн хүрээнд 5000 хүн ажлын байртай болж 1 сая айлын гадаах гудамж гэрэлтэй болсон гэх албан бус судалгаа байдаг. Ингээд ч зогсохгүй нарны эрчим хүч цуглуулах, хавтанг ашиглах, засварлах, бүтээх боловсон хүчнийг бэлтгэхийн тулд Мали улсын нийслэл Бамако хотод “Solar Academy” сургалтын төвийг байгуулсан байна.

Эйкон 2013 онд СИИ-д өгсөн ярилцлагадаа “Би Африкт маш том нөлөө үзүүлэхийг хүсэж байна” хэмээж байв.

Харин энэ оны нэгдүгээр сарын 20-нд Акон “Эйкон хот”-ыг байгуулах компанитайгаа 6 тэрбум ам.долларын гэрээ байгуулсан гэдгээ зарласан. Гэрээ хийсэн компани нь АНУ-д байрлалтай “KE International” бөгөөд хотыг байгуулах эхний шат 2023 оны сүүлээр дуусах аж. Үүнд зам, цагдаа, эмнэлгийн байр, сургууль, нарны цахилгаан станц, хогийн цэг, зочид буудал, оршин суугчдын барилга зэргийг барих юм.

“KE International” нь Кени улсад 5000 ор бүхий тусгай эмнэлэгтэй 35 мянган оршин суугчтай “Mwale Medical and Technology City” гэх хот барьж буй ба 2020 оны арванхоёрдугаар сард дуусгавар болно. Тус хот дахь 2019 онд нээгдсэн “Hamptons” эмнэлэг саяхнаас “Akoin” крипто валютыг ашиглаж эхэлсэн бөгөөд “Эйкон хот”-ын эхний шатанд тус эмнэлгийн салбар болоод “Hamptoms” их дэлгүүр баригдах юм.

Харин хоёрдугаар шат 2024-2029 он хүртэл үргэлжлэх ба зөвхөн “Akoin” крипто валютаар арилжаа хийх дэлхийн анхны крипто хот болох аж.

Дэлхий даяар 35 сая цомгоо зарсан, 47 настай Эйконы 27 дуу “Billboard Hot 100”-д багтаж байв.

Эх сурвалж: Bitcoin.com, Bloomberg.com, CNN.com, BlackEnterprises.com