Ерөнхий сайд Л.Оюун-Эрдэнийн БНХАУ-д хийж буй албан ёсны айлчлал үргэлжилж байна. Ерөнхий сайд Л.Оюун-Эрдэнэ, БНХАУ-ын Төрийн зөвлөлийн Ерөнхий сайд Ли Чян нар өчигдөр Шанхай хотноо албан ёсны уулзалт хийж, Эрдэнэбүрэнгийн УЦС-ын санхүүжилт, олон жил гацсан Гашуунсухайт-Ганцмод боомтын хил дамнасан төмөр замын гүүр хамтран барих тухай Монгол Улсын Засгийн газар БНХАУ хоорондын хэлэлцээрийг  баталгаажуулсан юм. Айлчлалын үр дүнгийн талаар Ерөнхий сайдын байр суурийг сонслоо.

-Айлчлалын үеэр Эрдэнэбүрэнгийн УЦС-ын төслийн санхүүжилтийг бүрэн шийдвэрлэлээ. Цаашид ямар ажлууд үргэлжлэх вэ?
-Ажлын айлчлалын үеэр Эрдэнэбүрэнгийн УЦС-ын гэрээ,  “Ерөнхийлөгч нарын нэрэмжит спорт цогцолбор” төслийг хэрэгжүүлэх санхүүжилт шийдэгдлээ. Мөн мэдээллийн технологийн шилжилт, стандарт хэмжилзүйн салбарт хамтрах хүрээнд хоёр улсад хүчин төгөлдөр хэрэгжиж буй хууль тогтоомж, дүрэм журам, үндэсний бодлогыг баримтлан стандартыг ижилтгэх, ногоон хөгжлийн чиглэлээр хамтран ажиллах баримт бичгүүдэд гарын үсэг зурж, баталгаажууллаа.

Засгийн газрын 14 мега төслийн нэг болох Эрдэнэбүрэнгийн УЦС-ын зээлийн хэлэлцээр эцсийн байдлаар батлагдлаа.

Эрдэнэбүрэнгийн УЦС-ын тухайд 1964 оноос урьдчилсан судалгаа нь эхэлсэн. Ерөнхийлөгч У.Хүрэлсүх Ерөнхий сайд байхдаа 2019 онд БНХАУ-тай хийх зээлийн хэлэлцээрийн хүрээнд  энэ төслийг санхүүжүүлэхээр тусгасан. Тухайн орон нутгийн иргэдийн санал болон байгаль орчны үнэлгээтэй холбоотой олон асуудал гарч улс төрийн гацаа үүссэн төсөл өнөөдөр баталгаажсанаар хамтарсан Засгийн газрын 14 мега төслийн нэг болох Эрдэнэбүрэнгийн УЦС-ын зээлийн хэлэлцээр эцсийн байдлаар батлагдлаа. Энэ бол олон жил гацсан мега төслүүд хэрэгжиж эхлэх сайн дохио гэж үзэж болно.

-Хоёр орны Ерөнхий сайд нарын уулзалтаар олон жил яригдсан Гашуунсухайт-Ганцмод боомтын хил холболт хийх асуудлыг шийдвэрлэлээ гэж ойлгож болох уу?
-Олон жил яригдаж хүлээлт үүсгээд байсан Гашуунсухайт-Ганцмод боомтын хил холболтын асуудал шийдэгдлээ. Засгийн газраас энэ асуудлыг УИХ-д оруулж, УИХ-ын тогтоол батлуулснаар эрхзүйн орчин бүрдэж, төсөл хэрэгжиж эхэлнэ.
БНХАУ-ын Ерөнхий сайдтай хийсэн уулзалт нэлээд удаан үргэлжиллээ. БНХАУ-ын Засгийн газар болон “Чайна Энержи” компани байр сууриа нэгтгэсэн байна. “Гашуунсухайт-Ганцмод боомтын дараа Ханги-Мандал, Шивээхүрэнгийн боомтыг холбоход бэлэн байна” гэсэн байр суурийг илэрхийлсэн.

Монгол Улсын парламент болон нийгмээрээ 16 жил гацсан төмөр замаа Монголын тал өргөн, Хятадын тал нарийн царигаараа холбох тохиролцоонд хүрлээ.  

Бидний ойлгох нэг зүйл бол аль намаас сонгогдсон нь хамаагүй, Монгол Улсын улс төрийн тогтворгүй байдлын улмаас гацсан асуудал өнөөдөр шийдэгдэж байгаа нь чухал. 126 гишүүнтэй парламент энэ төслийг дэмжин тогтоол батална, Засгийн газар энэ төслийг хэрэгжүүлнэ гэж итгэж байна.

Ерөнхий сайдын хувьд хэлэхэд бид олон жил гацаж, домог болсон төслүүдээ бүгдийг хэрэгжүүлэх ёстой. Мөн хиймэл оюун ухаан, дэвшилтэт технологи, хот байгуулалт гэх мэт шинэ төслүүдийг эхлүүлнэ. 20 жилийн өмнөөс яригдсан төслүүд өнөөг хүртэл дуусаагүй байгаа нь энэ асуудалдаа бид улс төрийн дүгнэлт хийх ёстой.

-Шанхайн импорт үзэсгэлэнгийн нээлтийн үгэндээ хөрөнгө оруулагчдыг Монголд хөрөнгө оруулахыг урьсан. Хөрөнгө оруулалтын орчныг бүрдүүлэх хүрээнд улс төрийн ойлголцолд хүрсэн гэж ойлгож болох уу?
-1992-2024 он хүртэл Монгол Улс уламжлалт мажоритор тогтолцоотой парламентын 76 гишүүнтэй байв. Олон давуу тал байсан хэрээр сул талууд ч их байлаа. Одоо бид шүүмжлэхээс илүүтэй одоо 126 гишүүнтэй парламентын анхны намрын чуулгандаа багтаж Монгол Улсын нэр хүндийг олон улсад унагаасан, Монгол Улс өөрөө үгнээсээ буцсан, хуулийг буцааж хэрэглэсэн гэх мэт бүх асуудлаа цэгцэлж, шинэ гараанаас ажилдаа орохыг хүсэж байна.

Монгол Улсын ДНБ 132 их наядаас дээш гарах бүрэн боломж байна.

Санаснаар болдог бол Лаосын эдийн засгийн форумаар “Монгол Улсад хөрөнгө оруулалт хийгээч, Монголчууд хэлсэндээ хүрдэг, Монгол Улсын эдийн засаг бүс нутагтаа хамгийн хурдтай хөгжиж буй энэ үзүүлэлтээ бид хадгална” гэж Монгол Улсын улстөрч, бизнесмэн, улс төрийн нам бүхэн итгэл төгс хэлдэг болбол нэг хүнд ДНБ 10 мянган ам доллар, эдийн засаг энэ хурдаараа өсвөл Монгол Улсын ДНБ 132 их наядаас дээш гарах бүрэн боломж байна.

Энэ удаагийн айлчлал үр дүнтэй боллоо. Зөвхөн төслүүд биш Монгол Улсын нийслэл Улаанбаатар хотыг Бүсчилсэн хөгжлийн үзэл баримтлалтай хамтад нь төлөвлөж, төлөвлөгөөг УИХ-д өргөн мэдүүлэх гэж байна. Энэ агуулгаар БНХАУ-ын Бээжин, Шанхай хотын хот байгуулалтын инженерүүдтэй хамтарсан ажлыг эхлүүлж байна. Олон сая хүн амтай хотыг хэрхэн төлөвлөж, зохицуулж, хөгжүүлж байгаа жишээг бид харлаа. Цөөн хүн амтай манай улсын хувьд ерөнхий төлөвлөлт зөв байх ёстой.

Уламжлалт эрчим хүчээ сэргээгдэх эрчим хүч рүү шилжүүлэх эрчим хүчний шинэчлэл хийх ёстой. Монгол Улс сэргээгдэх эрчим хүч үйлдвэрлэгч хэрэглэгч төдийгүй экспортлогч улс болох боломжтой. Зөвхөн нүүрс биш эрчим хүч манай улсын экспортын хоёр дахь чиглэл байх болно. Гурав дахь нь аялал жуулчлал. Энэ гурван салбарт тулгуурласан эдийн засгийг бэхжүүлэх зорилт тавин Засгийн газар ажиллаж байна.