АНУ-ын Мэриланд мужаас андууран албадан гаргаж, Эль Сальвадорын “террористуудын хорих төв” рүү шилжсэн иргэнтэй Мэрилэнд мужийн сенатч Крис Ван Холлен уулзсан талаараа мэдээлэв.

Энэ талаар Холлен "Түүнийг эхнэр Женнифертээ хайртай гэж дамжуулсныг нь уламжилсан. АНУ-д буцаж очмогцоо бүрэн мэдээлэл өгөхийг тэсэн ядан хүлээж байна" гэжээ. 

Тодруулбал энэ оны гуравдугаар сард АНУ-д оршин суудаг Эль Сальвадорын иргэн, 29 настай Килмар Абрего Гарсиаг албадан гаргасан.

Цагаан ордон түүнийг олон улсын зохион байгуулалттай МS-13 гэмт бүлэглэлийн гишүүн гэж буруутгаж байгаа ч түүний өмгөөлөгч үүнийг эрс няцааж буй.

Улмаар түүнийг Венесуэл болон Эль Сальвадорын иргэдтэй цуг албадан гаргаж Эль Сальвадор дахь Секот төвд хүргэсэн юм.
Түүнийг АНУ-д буцаан оруулахыг холбооны шүүгч захирамжилсан ч Трампын засаг захиргаа татгалзсаар байгаа аж.

Эль Сальвадорын ерөнхийлөгч Найиб Букеле ч мөн түүнд суллагдах боломж олгоогүй бөгөөд тус улсын хамгаалалтад үлдэх болно гэж мэдэгдээд байна.

Мэрилэндийн шүүгч 2019 онд түүнийг албадан гаргахаас хамгаалах шүүхийн шийдвэр гаргасан бөгөөд Трамп энэ шийдвэрийг зөрчсөн гэж үзжээ.

Трампын засаг захиргааны зарим хүмүүс түүнийг санамсаргүйгээр гаргасан гэдгийг хүлээн зөвшөөрсөн ч Цагаан ордон энэ нь алдаа биш гэж мэдэгдсээр байгаа юм.

Цагаан ордны хэвлэлийн төлөөлөгч Каролин Левитт лхагва гарагийн хэвлэлийн хурлын үеэр “Тэр хүн дахиж хэзээ ч АНУ-д амьдрахгүй” хэмээн мэдэгдсэн. 

Эх сурвалж: ВВС