Боловсролын салбарын цахим системүүдийн хоорондын уялдаа холбоог сайжруулах зорилготой ажлын хэсгийн уулзалт өнөөдөр боллоо.

Уг уулзалтаар

• eec болох ирц, хичээл, багш сурагчдыг бүртгэдэг систем
• Боловсролын үнэлгээний төвийн даалгаврын сан, элсэлтийн ерөнхий шалгалтын сан гэх хоёр үндсэн системийн сайжруулалтыг хэлэлцэв.

Тодруулбал, бүртгэлийн системээс гадна хоол үйлдвэрлэл, түрээс сурах бичгийн мэдээллийг багтаасан нэгдсэн системүүдийг хувийн хэвшил хийж төрийн үүргийг хуваалцах талаар санал солилцлоо.

Боловсролын үйлчилгээг цахимаар үзүүлдэг 30 орчим систем нь хоорондоо уялдаагүй байгаа нь багш, сурагч, эцэг эх, асран хамгаалагчдад цахим дарангуйлал, учруулж буй гэж тус уулзалтад оролцсон төлөөллүүд үзэж байна.

Эдгээр системийг цэгцлэх, хоорондын уялдаа, мэдээлэл солилцоог сайжруулах, мэдээлэл технологийн нэгдсэн интерфэйс буюу нэгдсэн багийн архитектурыг боловсруулах ажлын хэсгийг байгуулан ажиллаж эхэлжээ.

“Ангиа”боловсролын технологийн холбооны тэргүүн Ц.Түвшинтөр “Боловсролын яам, Хамтарсан Засгийн газрын үеэс цахим шилжилтийг маш эрчимтэйгээр ярьж байна. Өнөөдрийн хурлаар төр, хувийн хэвшлийн хамтын ажиллагааг өндөр түвшинд гаргах нь зүйтэй гэж хэлэлцлээ.

Уг хуралд манай холбооны зүгээс: Ерөнхий боловсролын сургуулийн багш, сургууль цахим дарангуйлалд өртөх эрсдэлтэй байна. Давхардсан маш олон системүүдтэй. Эдгээрийн уялдааг сайжруулах шаардлага байна. Учир нь сургуулийн багш, сурагч эцэг эхчүүд олон системийг ашиглах нөхцөл үүссэн. Үүн дээр төр хувийн хэвшил хамтарч, нээлттэй ярилцаж шийдэл олох нь зүйтэй.

Эхний ээлжид хиймэл оюун ухаан түшиглэсэн орчин үеийн технологиудыг нэвтрүүлж, хэрэгжүүлэхэд туршилтын хугацаа шаардлагатай. Туршилтын хугацаанд амжилттай хэрэгжсэний дараагаас бодит шилжилтийг сургуулиудад нэвтрүүлэх хэрэгтэй.

Хувийн хэвшил “24” цагаар ажилладаг бол төр найман цаг ажиллаж байна

Түүнчлэн шударга өрсөлдөөнийг бий болгох ёстой. Зах зээлд хувийн хэвшлүүд чөлөөтэй өрсөлдөж эхэлбэл заавал нээлттэй, ямар нэгэн эрх ашгийн зөрчилгүй байх ёстой. Үүнд: үнэ, чанар, тухайн нэгж газруудтай хамтарч ажиллах зэргийг нээлттэй шударга явуулах гэсэн 3 асуудлыг хөндлөө.

Төсвийн мөнгөөр бий болсон төрийн системүүд хэрхэн хувийн хэвшлийн системүүдтэй холбогдох уу гэх мэт асуудлыг цар тахлын үеэс хойш хийгдсэн. Сайн тал байгаа ч дутагдалтай зүйлүүд байна. Энэ нь төрийн ажиллах хурд хувийн хэвшлийн ажиллах хурд хоёр асар зөрөөтэй. Өөрөөр хэлбэл хувийн хэвшил “24” цагаар ажилладаг бол төр найман цаг ажиллаж байна. Энэ асуудлыг системийн хөгжүүлэлтийг сайтар ярьж төр, хувийн хэвшлийн ажиллах хурдыг аль болох ойртуулах ёстой” гэж ярилаа.

Энэ үеэр Боловсролын сайдын зөвлөх Д.Гантулга “Энэхүү ажлын хэсэг нь боловсролын салбарын үйлчилгээг шинжилж, үр дүнд нь нэгдсэн ойлголтод хүрч, төр болон хувийн хэвшлийн хариуцах үйлчилгээ, ажиллах зарчмыг зааглаж, тодорхой болгоно.

Ингэхдээ зах зээлийн шударга өрсөлдөөнийг дэмжиж, монгол инженерүүдийн шинэ санаачилга, дэлхийн технологийг нутагшуулах зорилготой ажиллана.

Засгийн газрын мөрийн хөтөлбөрт төрийн оролцоог багасгаж хувийн хэвшлийн оролцоог сайжруулна гэх зорилт бий.Энэ зорилтын хүрээнд хувийн хэвшлүүд энэ чиглэлээр төсөл хэрэгжүүлэхийн тулд боловсролын яамыг зорьдог болгохгүй. Харин сургууль , багш, сурагч, эцэг эх, асран хамгаалагчийн хэрэгцээ шаардлагыг хангах байдлаар өрсөлддөг зах зээлийн зарчмыг бий болгохыг зорьж байна.

Бидний юу болохгүй байна, системүүд хоорондоо яаж холбогдож байна, цаашдаа төр хувийн хэвшил өрсөлдөж буй мэт байх уу, алслагдсан аймаг сум дүүрэгт яаж хүрэх вэ гэх мэт асуудлыг ярилцана.

Үүний дараагаас мэргэжлийн баг гарч бүх үйлчилгээг багтаасан системийн архитектурын зураглалыг гаргана. Зураглал дээр үндэслэн төр хувийн хэвшил хамтдаа хийх, хариуцаж буй ажлыг тодорхой болгоно. Үүн дээр үндэслэн бодлого журам гарна. Зураглал гарснаас хойш долоон хоногийн дотор энэ бүхэн тодорхой болох боломжтой” гэв.

"ЧАДАХ ЮМАА ӨӨРСДӨӨ ХИЙЖ, ХӨГЖҮҮЛЖ АШИГЛАЖ БАЙЖ Л ДЭЛХИЙН ХӨГЖЛӨӨС ХОЛ ХОЦРОХГҮЙ"

МУИС-ийн профессор "Дижитал солуйшин" компанийн захирал  А. Энхбаяр “Олон жил замбараагүй явсан системийн давхардлыг арилгаж нэг чиглэл рүү оруулъя гэдэг зөв. Технологи асар хурдацтай хөгжиж байгаа энэ үед монголчууд технологиор хоцрогдож байна. Тэр дундаа боловсролын технологиуд маш олноор гарсаар байна.

Одоо байгаа асуудлаа ярихаас гадна ирээдүйд дэлхий хаашаа явах талаар ярихаас өөр аргагүйд хүрчээ. Тиймээс үүнийг ярилцаасай гэдэг саналаа хэллээ.

Бид технологийг өөрсдөө хөгжүүлж нэвтрүүлснээр Монголын болон боловсролын технологи, судалгаа зэрэг хамт хөгжинө.
Дэлхийд гарч байгаа бэлэн программуудыг хэдэн тэрбумаар оруулж ирж байгаадаа бид баярлаад явж байна. Түүний оронд өөрсдөө хөгжүүлж нэвтрүүлбэл зардал бага, шинэчлэхэд хялбар болно.  Чадах юмаа өөрсдөө хийж, хөгжүүлж ашиглаж байж л дэлхийгээс хол хоцрохгүй.

Боловсролын дижитал шилжилтийн гол үндэс сурагч төвтэй идэвхтэй байдаг.

Виртуал танхим, хиймэл оюун ухаан, виртуал сургуулиуд дэлхийд бий болоод эхэлчихсэн. Бид хоцрогдож байна. Тиймээс хэдэн жилийн дараа “бид  хийж чадахгүй байна” гээд гаднаас худалдаж авах хэрэгтэй болно” хэмээлээ.

Тус ажлын хэсгийг Боловсролын сайдын зөвлөх Д.Гантулга ахалж байгаа бөгөөд бүрэлдэхүүнд нь төрийн болон хувийн байгууллагуудын 40 гаруй төлөөлөл багтаж байна.

А.Саранчимэг