УИХ-ын гишүүд тангаргаа өргөж дууслаа. Сонгуулийн дүн гарсантай зэрэгцэн МАН эвслийн засгийн газар байгуулна гэсэн яриа гарсан.  

МАН-аас УИХ-ын гишүүн болсон түшээд ч үүнийг үгүйсгэсэнгүй. Эвслийн Засгийн газрыг хэн дэмжиж, хэн дэмжээгүй вэ?

УИХ-ын гишүүн болсон О.Батнайрамдал:
-Эвслийн Засгийн газрын тухайд манай улстай ойролцоо орнуудыг харах хэрэгтэй. Манайтай хамгийн адилхан бүтэцтэй нь Шинэ Зеланд юм. Тус улсад 1997 оныг хүртэл манайх шиг, хоёр нам өрсөлддөг байсан юм билээ. Сонгуулийн холимог тогтолцоотой болсноор дийлэнхдээ Эвслийн Засгийн газартай ажиллажээ.

Эвслийн Засгийн газрыг зөвхөн тохиролцоо гэж харж болохгүй. Илүү урт хугацааны бодлого хэрэгжүүлэх гэх мэт давуу талууд бий. Дараагийн сонгуулийг мөн холимог тогтолцоогоор явуулснаар хамтарсан Засгийн газар байгуулагдах магадлал өндөр.

Төрийн онол, зохистой харьцааны хувьд эрх баригч нам эрхээ барьдаг, сөрөг хүч нь байр сууриа хянадаг, зарим тохиолдолд тодорхой зорилгоор эвсдэг үзэгдэл  байдаг.

УИХ-ын гишүүн А.Ариунзаяа: Улс орны хөгжлийн хөтөлбөр, бодлогоо нэгтгэвэл хөгжил хурдан байх болов  уу. Германы төрийн байгууллагын засаглалыг судалж байхад улс төрийн намуудын байр суурийг тэгш оролцуулж хөгжсөн шилдэг жишээнүүд байдаг. Хөгжлийн хөтөлбөр, үзэл баримтлалаараа нэгдэж чадвал энэ шийдвэрийг үгүйсгэхгүй.

УИХ-ын гишүүн О.Цогтгэрэл:
-Эвслийн Засгийн газарт орох, эсэхэд бидний хувь хүний үзэл бодол хамаагүй. Намын эрх бүхий байгууллага хэлэлцэн шийднэ. Олонх ямар шийдвэр гаргана, түүнийг нь дагана. Бидэнд МАН-аас санал ирээгүй, УИХ-ын бүрэн эрх сая л хэрэгжиж эхэллээ шүү дээ.  Бидэнд санал тавиагүй, хэлэлцээгүй, шийдвэр гаргаагүй тул АН Эвсэнэ гэдэг нь ташаа мэдээлэл.Хувь хүнийхээ хувьд хэрвээ Засгийн газарт орох болбол би орж ажиллахгүй.

УИХ-ын гишүүн Ч.Лодоймсамбуу:
-АН өмнө нь гурван удаа Эвслийн засгийн газар байгуулсан туршлагатай. Үүний үр дүнд МАНАН гэх ойлголт үүссэн. Хамтарч хулгай, авлигын схем хийсэн. Өнгөрсөн чуулганы үеэр сонсгол хийж,  би, чидээ тулж, баахан юм болсон. Шинэ МАНАН үүсгэж болохгүй гэсэн байр суурьтай байна.

Энэ асуудлыг хоёр талаас харж байна. Нэг нь төрийн ажил талаасаа улс төрийн нам ямар нэг эрх мэдэл авч, түүнд таарсан хэмжээгээрээ мөрийн хөтөлбөрөө хэрэгжүүлнэ.Заавал 100 хувийн эрх мэдэл байх албагүй. Үүний төлөө сонгууль хийдэг. Нөгөө талд, эвсэхээр хяналтгүй, хариуцлагагүй  Засгийн газар бий болно. Манай засаглалын хэлбэр их тодорхойгүй. Цаасан дээр, хуульд парламентын засаглалтай гэсэн ч одоо Ерөнхий сайдын засаглалтай байна.

Бодит үнэн нь энэ. Ийм нэг шалтгаан, зөвтгөл хэлдэг. Улс төржихгүйгээр, гол ажлуудаа явуулъя гэдэг. Ямар ажлууд хийх нь тодорхойгүй, өөр нам битгий хэл өөрсдөө дангаараа найман жил засаглахдаа юу ч хийгээгүй. Энэ тухай бид сонгуулиар зөндөө ярьсан. Авлигатай тэмцээгүй, төсвийн зардал нэмэгдсэн. Одоо саналын түвшинд яригдаж, МАН урилга өгч байх шиг байна. Бид нам дотроо ярилцана.

УИХ-ын гишүүн Н.Номтойбаяр:
Ард иргэдийн сонголт МАН-д ялалтыг өгсөн. МАН дангаараа Засгийн газраа байгуулаад ажиллах ёстой гэж бид үзэж байна. Бидэнд урилга ирээгүй.

УИХ-ын гишүүн болсон Д.Пүрэвдаваа:
-Эрх баригч МАН дангаараа 68 суудал авч, Засгийн газар байгуулах эрхтэй болсон. Ард түмэн бусад намуудыг  маш сайн сөрөг хүчин байгаасай гэж саналаа өгсөн байх. Үндэсний эвсэл сөрөг хүчин байна. Хамтарсан Засгийн газарт орж ажиллахгүй.

ХҮН намын гишүүн Ж.Золжаргал :
-Албан ёсоор тийм мэдээлэл сонсоогүй. Төрийн онол, зохистой харьцааны хувьд эрх баригч нам эрхээ барьдаг, сөрөг хүч нь байр сууриа хянадаг, зарим тохиолдолд тодорхой зорилгоор эвсдэг үзэгдэл бол байдаг юм билээ. Албан ёсны санал гарч ирсний дараа намууд ярилцаад шийдвэрээ гаргах байх гэсэн бол ИЗНН "Эвслийн Засгийн газарт оролцохгүй. Харин иргэдэд санал авахдаа амлаж байсан маш сайн сөрөг хүчин байх амлалтдаа хүрэх болно" гэж мэдэгдэв.

МАН-ын зарим гишүүн эвслийн Засгийн газар байгуулахыг эсэргүүцэж, энэ нь ирэх аравдугаар сард болох орон нутгийн сонгуульд сөргөөр нөлөөлнө гэж үзэж байна.  

Гэрэл зургуудыг Г.Өнөболд