2024-2025 оны хичээлийн шинэ жил эхэлснээр нийслэлд гурван ээлжээр хичээллэж буй нийт 9 сургуулийн 3272 хүүхэд байна.

• 113 дугаар сургууль | 10 дугаар сарын 1-ний өдөр хүртэл 5 бүлгийн 200 хүүхэд
• 10 дугаар сургууль | 10 дугаар сарын 1-ний өдөр хүртэл 19 бүлгийн 665 хүүхэд
• 5 дугаар сургууль | 10 дугаар сарын 1-ний өдөр хүртэл 6 бүлгийн 250 хүүхэд
• 141 дүгээр сургууль | Түрээсийн байр олтол 11 бүлэг 470 хүүхэд /1 түрээсийн байртай/
• 123 дугаар сургууль | Түрээсийн байр олтол 7 бүлгийн 247 хүүхэд
• 130 дугаар сургууль | Түрээсийн байр олтол 8 бүлгийн 480 хүүхэд
• 131 дүгээр сургууль | Түрээсийн байр олтол 2 бүлгийн 51 хүүхэд
• 38 дугаар сургууль | Түрээсийн байр олтол 3 бүлгийн 120 хүүхэд
• 62 дугаар сургууль | Түрээсийн байр олтол 17 бүлгийн 789 хүүхэд      /Боловсролын яамнаас өгсөн мэдээлэл/

-Бид нийслэлийн 141-р сургуулиас нөхцөл байдлыг тодрууллаа-

2024.09.12-ны өдөр, 16:55 цаг:

Сургуулийн коридорт чимээ хадаж, бага ангийн сурагчид нааш цааш хэрнэ. Бужигнасан хүүхдүүдээс захалж, цонхоор ширтэх н.Тэмүүлэн хүү "Манай дүү орой хичээллэж байгаа гуравдугаар ангийн сурагч юм. Бид хоёр хамт харих ёстой болохоор ангийн нь гадаа хүлээж байна.

Дүү маань сая л үдийн цайндаа орж байна. Хичээлийнхээ дундуур 20 минут завсарладаг. Дахиад зөндөө удаан хүлээх байх. Хэр удахыг мэдэхгүй.

Би тавдугаар ангид сурдаг. Дүүгээсээ том, хурдан гүйдэг. Дүү удаан болохоор дандаа хойно үлддэг. Уг нь дүүгийн оронд би орой хичээллэсэн бол гэр рүүгээ хурдан гүйгээд л харина.

-Та хоёрын хичээлийг тарахад гэрээс нь хүн ирж авдаггүй юм уу? 
-Аав ээж замдаа түгжрээд байна гээд амждаггүй. Би том болохоор дүүг дагуулаад харьж чаддаг.

-Дүүгээ авч, гэртээ хариад хэдэн цагт хоолоо иддэг вэ?
-Ээж гэрт ирээд хоол хийж өгдөг. Би арай л хоол хийж чадахгүй. Бараг есөн цаг өнгөрсөн байдаг байхаа" гэв.

Үдийн завсарлага дууссаны дараа гурав дахь ээлжид хичээллэж буй багштай ярилцлаа.

"Манай сургууль 950 хүүхэд суралцах хүчин чадалтай ч одоо 5000 гаруй хүүхэд сурдаг. Тиймээс бага ангийн сурагчид, тэр дундаа гуравдугаар ангийн сурагчид орой хичээллэж байна.

Өнгөрсөн хичээлийн жилийн хувьд сургуулийн коридор, булангууд зэрэг жижиг зай бүрийг ашиглаад анги болгож хичээллэсэн. Даацаа дийлэхгүйгээс энэ жил гурван ээлжээр хичээллэх болсон.

Хичээл үдээс хойш буюу 15:30 цагт эхэлдэг тул 16, 17 цаг гэхэд дөнгөж л эхний хоёр, гуравдугаар цагийн хичээл орж байна. Хүүхдүүдийн хичээлийн идэвх, оролцоо сул байна.

Нийт таван цаг хичээллэхэд 19:25 цагт тарах ёстой. Гэхдээ захирал хэлэхдээ, "Гуравдугаар ангийн сурагчид учраас Зураг, Хүн орчин, Иргэний боловсрол гэсэн гурван хичээлийг интеграцчилж /хичээлүүдийг өөр хооронд нь холбон заах/ ороорой" гэж зөвлөсөн.

Өдөр бүр нийт дөрвөн цаг хичээллээд 18:40 цагт тарах зохицуулалттай ажиллаж байна. Ийм байдлаар 12 дугаар сарыг дуустал хичээллэнэ. Цаашдаа хэвийн буюу өдөр бүр таван цагаар хичээллэнэ гэсэн үг.

Хэдий бид хичээлийг нэгтгэж, таван цагийн хичээлийг дөрвөн цагт шахаж орж байгаа ч гэсэн жилийн жилд ийм байдалтайгаар яваад байвал хүүхэд хичээлийн хоцрогдолд орох магадлалтай.

Даац хэтэрсний улмаас нэг ангид 40 гаруй хүүхэд сууж байна.

Багш, хүүхэд гэлгүй л 17, 18 цаг гэхэд ажил, хичээл тардаг гэсэн дадал болсон дохиолол тархинд байгаа шүү дээ. Хүүхдүүд нозоорсон байдалтай, хичээлээ хүлээж авахгүй байхад хичээлээ эрч хүчтэй заамааргүй ч юм шиг. Орж ирэнгүүт нь л шинэ хичээлээ заахгүй бол хэцүү" хэмээн гуравдугаар ангийн багш Д.Насангэрэл ярилаа.

Харин сурагчид нь "Хичээл өглөө орвол гоё" гэж нэг дуугаар хариулав.

"10 ДУГААР САРЫН 10-НААС ГУРВАН ЭЭЛЖЭЭР ХИЧЭЭЛЛЭХЭЭ БОЛИНО"

Энэ сарын 11-ний өдрийн Засгийн газрын ээлжит хуралдааны дараа гишүүд мэдээлэл өгөх үеэр Боловсролын сайд П.Наранбаяр "Эдгээр сургуулийн хоёр нь урсгал засвар дуусаагүй. Гурван сургуульд нь түрээсийн байр олдоогүй нөхцөл байдалтай байна.

Засгийн газар 100 хоногийн төлөвлөгөө гаргасан. Үүнд бүх сургуулийг хоёр ээлжээр хичээллүүлнэ гэсэн зорилт тавьсан. Тиймээс бид гурван ээлжээр хичээллэхийг зогсоох бодлогыг хатуу барина.

Ашиглалтад ороогүй, барилгын гүйцэтгэл нь дуусаагүй сургуулиудын гүйцэтгэлийг хангуулахаар нийслэлийнхэнтэй ярилцсан. Жишээлбэл, нийслэлийн 62 дугаар сургуулийн өргөтгөлийг дөрвөн жил барьж дуусаагүй байсан. Энэ асуудлыг нийслэлийн төслийн тодотголоор батлуулж, 12 дугаар сард ашиглалтад оруулахаар болсон.

Хөрөнгө оруулалтын зардал талаас энэ жил шинэ цэцэрлэг, сургууль барих боломжгүй гэдгийг Сангийн яам илэрхийлж байгаа.  Тиймээс өмнөх буюу он дамнасан, баригдаж дуусах нь төлөвлөлтөөрөө явж байгаа барилгуудын гүйцэтгэлийг шахна.

Одоогоор 190 гаруй сургууль, цэцэрлэгийн барилга барих төлөвлөгөөт ажил явж байгаа. Үүнийг дуусгах зорилготой байна.

Жишээ дурдахад, 2025 онд ашиглалтад орно гэсэн нийт 11 барилгын гүйцэтгэлийн ажлыг шахаж ашиглалтад оруулна. Ингэснээр 15 мянган хүүхэд суралцах боломжтой болж байгаа юм. Ийм байдлаар төсөвт төлөвлөгдсөн ажлуудыг хариуцлагатайгаар дуусгана.

Өргөтгөлийн барилга нь таван жил баригдаж дуусаагүй 5 дугаар сургуульд бид очиж ажилласан. Үр дүнд нь барилгын гүйцэтгэл 99 хувьтай байна. Удахгүй дуусна.

Энэ мэт хариуцлагагүй ажиллаад байгаа ААН-үүдтэй тооцоо бодох, хариуцлага тооцож, ажлыг нь дуусгахад анхаарч ажиллаж байна" гэж мэдээлсэн юм.

Тэгвэл эдгээр сургуулиудад ойрын хугацаанд ямар арга хэмжээ авах гэж байгааг Боловсролын яамнаас тодрууллаа. Яамны Хэвлэлийн төлөөлөгч Т.Отгонбаатар хэлэхдээ "10 дугаар сарын 10-ны дотор байр түрээсэлж, эдгээр сургуулиудыг гурван ээлжгүй болгохоор ажиллаж байна" гэсэн юм.

ИЙМ БАЙДАЛТАЙ НЭГ САР ТЭСЭХ АМАРХАН ГЭЖ ҮҮ

Манай улс жил бүр хүн амын тооллого хийдэг биш билүү. Шинээр мэндэлсэн хүүхэд бүр зургаан нас хүрч, сургуульд орно гэдгийг мэддэг биз дээ, үе үеийн сайд дарга нар аа. Энэ мэт судалгаагаар ирэх хичээлийн жилд хэдэн хүүхэд сургуульд элсэхийг бүрэн тооцох боломжтой. Судалгааг ашиглахгүй, тооцоолохгүй юм бол татвар төлөгчдийн мөнгөөр тооллого хийх хэрэг юу вэ?

17:00 цаг болж байхад хичээл нь дундаа орж, шинэ сэдвээ ойлгох гэж үзэж тарж буй багш, сурагчдын "хэцүүг", 17:00-18:00 цаг гэхэд ажил нь тардаг сайд, дарга нар яаж төсөөлөх юм бэ?

Нийслэлийн 62-р сургуулийн сурагчид 20:30 минутад хичээл нь тарж буйг эцэг эх, хэвлэл мэдээллийн байгууллагууд баримттай мэдээлж байна. Ингэж тарсан хүүхдүүд хэдэн цагт гэртээ харьж, хэдэн цагт хоолоо идэж байгаа бол. 22:00 цагт унтах ёстой хүүхдүүд хэдийгээр нь гэрийн даалгавраа хийх вэ?

Оройн сэрүүн салхи хавирга хатгаж, харанхуй гудмаар пөөнийж гүйлдэнэ. Ийм атал нэг сар тэсэх амархан гэж үү?

Ажилдаа хариуцлагагүй ханддаг тэдэнд, 3272 ХҮҮХЭД хичээлээ дутуу хагас ойлгож, харанхуй гудамжаар бэдрэх "хэцүү биш" бололтой.

"10 дугаар сарын 10-нд гурван ээлжээр хичээллэхээ болино" гэж буй тэдний үгс "ганц сар тэс" гэх шиг хүйтэн сонсогдоно.

Өнөөдөртөө л гадаа дулаахан мэт боловч маргааш нөгөөдөр гэхэд намрын хяруу бууж, хөрсөн дээрээ хүйтэрнэ. Оройн сэрүүн салхи хавирга хатгаж, харанхуй гудмаар пөөнийж гүйлдэнэ. Ийм атал нэг сар тэсэх амархан гэж үү?