Шинэ юм бүхэн гарч ирэхдээ сонин содон байдаг даа.

Тэр тусмаа Монголын хөгжмийн урлагт хүрээгээ тэлэн орж ирсэн хөгжмийн хамтлаг, дуучид тухайн үедээ тэсрэлт буулгасан гэдэг. Монголын залуус үсээ ургуулж барууны хөгжим сонсож эхэлсэн нь 1970-аад он гэж хэлж болно.

Тухайн үед тэдний учрыг хүмүүс мэдэхгүй барууны хэм маяг дуурайлаа, үсээ хачин ургуулж чанга хашгичсан гэж ад үзэж байсан удаатай. Тэр үед манай хотын сэхээтний давхаргын хэсэг залуус өөрсдөө шүтдэг хамтлаг болох "Битлз"-ийг дууг дуулцгааж нэгэн хамтлаг байгуулсан нь "Инээмсэглэл" байлаа.



1979 онд Монцамэ агентлагийн дэргэд "Инээмсэглэл" хамтлаг байгуулагджээ. "Бид цас ороход дуртай", "Улаанбаатарын үдэш", "Манайд ирээрэй", "Бүсгүй минь" зэрэг олон сайхан хит дуу өнөөдөр ч хуучраагүй, олны дуулах дуртай дуу хэвээрээ байгаа.

Монголын залуусын нэлээд хэдэн үе тэдний дуунуудыг радио, телевизээр сонсон хүмүүжиж ирсэн билээ. Дуучин Н.Ганхуяг хамтлагтаа энэ нэрийг өгсөн юм гэдэг. Тухайн үед "Баянмонгол", "Соёл эрдэнэ" гэсэн ердөө хоёрхон хамтлаг байсан билээ.

Домог болсон энэ хамтлагийн 30 жилийн ой тохиож байна. Тус хамтлагийн 60 гаруй дуу радиогийн алтан фондод хадгалагдаж байгаа аж.

Н.Лхагва