-”Камертон” хамтлагийн уран бүтээл завсарласан. Мээдээ маань гэр бүлтэй болсон-
“B” продакшны захи­рал, дуучин Д.Болдтой уулзаж ярилцлаа.

-Уран бүтээлийн олз омог их байна уу?
-Поп дуунуудаас бүтсэн “Амьдралын гол дүр” нэртэй цомог маань ирэх долоо хо­но­гоос худалдаанд гар­на. Нийт 14 дуутай. Эдгээр дуу­наас миний ая, Энх­тайваны шүлэг “Гэгээн домог” дуу FM-үүдээр цацагдаж бай­гааг сон­согчид нэлээд гайгүй хүлээж авч байна. Бүх нас­ныханд зориулсан хайрын сэдэвтэй энэ дууны клипийг “Cross animation” студид хий­сэн. Өчигдрөөс теле­визийн сув­гуу­даар гарч эхэл­сэн. “Амьд­ралын гол дүр” цомгийг үүрэн телефоны “UNI­TEL” компани, “Монгол газар”, “АПУ” компа­ни ивээн тэтгэлээ.

-Өөр дуучидтай хам­тарсан уран бүтээл байгаа юу?
-Манай продакшны дуу­чин Маралжингоо, Эгшиглэн нартай хамтарч дуулсан дуу байгаа. Таван настай охин Эгшиглэнтэйгээ хамтарч “Гол дүр” нэртэй дуугаа дуулсан. Цомог гарахаар миний охины ямар дуучин болохыг үзэгч, сонсогчид маань харах байх.

-Энэ цомгийнхоо дараа ямар уран бүтээл хийх вэ?
-Өмнө нь би “Хайрын хүч”, “440 герц” цомгоо гаргаж байлаа. Харин поп дууныхаа цомгийн дараа цэвэр R&B урс­галын дуунуудаа багтаа­сан бас нэг цомог гаргах бодол байна.

-Өмнөх цомгоо гаргаж, ”Пентатоник” наадмын шаг­налуудыг түүсний чинь дараахнаас “Гадаадын дуу­ны ая хулгайлсан” гэсэн яриа гарч байсан. Энэ та­лаар ямар бодолтой явдаг бол?
-Тэр яах вэ дээ. R&B урсгал чинь өөрөө тодорхой хэмжээ­ний дүрэмтэй байдаг. Транс, хип хоп, R&B урсга­лууд хөгж­мийн нэг хэмнэлээр явдаг. Монголд би анх удаа R&B урсгалыг оруулж ирсэн. Бөм­бөр ч юм уу, аливаа нэг хөгж­мийн хэмнэл адил хэм­жээнд явдаг болохоор “Ая хулгайл­чихлаа” гэсэн яриа гарсан байх. Хувь хүмүүсийн л атаар­хал шүү дээ. Оюуны өмчийн газраас шалгаж үзээд “Болдын дуунууд мөн” гээд миний нэрээр баталгаа­жуул­чихсан. Энэ тал дээр би нэг их эмзэглээд байдаггүй юм. Шар сонины мэдээ төдий л зүйл шүү дээ. Харин би уран бүтээлээрээ ямар хүн бэ гэдгээ илэрхийлэх сонирхол­той. Алдарт хуурч Жамъян гэдэг хүний гэр бүлд, ач нь болж төрснийх атаархагчдын бахыг хангахаар хүн би биш. Урлагаа би хэзээ ч орхихгүй­гээр үнэнч зүтгэнэ. Иймээс сайн, чанартай бүтээлүүд хийнэ гэсэн зорилго надад байгаа.

-”Камертон” хамт­ла­гийн­хантайгаа уулзалдаж байна уу?
-Хамтлагийнхаа хэдтэй уулзалгүй яахав. Харин уран бүтээлийн тал дээр хамтарч ажиллахаа түр завсарлаад байгаа. Мээдээ маань гэр бү­лийн амьдрал зохиож, охин­­той болсон. Одоогоор шинэ хүнээ асрах гээд зав зай муутай байна л даа.

-Гадаадад ойрдоо явав уу?
-Ойрд гадаад улс оронд тоглолт хийсэнгүй. CD-ндээ орох зураг авахуулах гэж Солонгос явж ирсэн юм бай­на.

-Монгол зурагчид маань гологдоод байна уу?
-Үгүй ээ, үгүй. Манай зурагчид сайн. Монгол­доо нэг ч болов шинэлэг зүйл хийе гэсэн үүднээс л Солон­госын нэрт зурагчинд хандсан юм. Солонгос зурагчид чинь дэл­хийн загварын алдартай сэт­гүүлүүдийн нүүр царайг то­дорхойлдог мэдрэмж, ур чад­вар сайтай мэргэжилт­нүүд байдаг.

-Танай продакшны уран бүтээлчид нэг хэсэг шуу­гиулж байгаад чимээ­гүй болчихов уу даа?
-DZ man, “ШО” хип хоп хамтлаг, “Гурван охин” хамт­ла­гийнхан, дуучин Марал­жингоо, Эгшиглэн бүгд л цом­гоо гаргах гэж байна. Хоёр ч цомог дээр нь би өөрөө нэ­лээд ажиллалаа.

-”MB” худалдааны тө­вийн талаар жаахан мар­гаан дэгдээд байсан уу, үгүй юу?
-Нэг их сүртэй маргаан энэ тэр болоогүй ээ. Өөр хүн л худалдаж авсан юм. “B” продакшнаа хотын төвд жаа­хан ойртуулъя гэж бодсон юм. “B” продакшнаа хотын төвд байгуулчихвал рок попынхон маань орж гараад Монголын маань рок, попын хөгжилд хавьгүй нэмэртэй байх болов уу.

Л.Батцэнгэл