Зам, тээврийн сайд Б.Дэлгэрсайхан өчигдөр ажлын хэсгийн хамт Багахангай-Хөшигийн хөндий чиглэлийн салбар төмөр зам барих төслийн барилгын ажлын явцтай танилцлаа.

Энэхүү салбар төмөр зам нь “Улаанбаатар төмөр зам” ХНН-ийн “Багахангай” өртөөнөөс салбарлан Төв аймгийн Сэргэлэн сумын урдуур болон мөн ”Чингис хаан” Олон Улсын нисэх онгоцны буудлын урдуур чиглэнэ. Хөшигийн хөндийд төлөвлөж буй ачаа тээврийн гол зангилаа болох “Тээвэр логистикийн бүс” хүрнэ.

Төмөр замын шугам нийт 102 км урт дан замтай, хоёр өртөө, дөрвөн зөрлөгтэй, 2.5 км урт орчим гүүрэн байгууламжтай. Барилгын ажлыг дотоодын 70 орчим ААН, компаниуд уртасгасан цагаар буюу 24 цагаар  гүйцэтгэж байна.

Энэ удаагийн төсөлд дан дотоодын ААН буюу 100 хувь монгол компаниудыг ажлын байраар хангаж байгааг инженер техникийн ажилтнууд онцлов.

Төмөр замын ажлын явц одоогоор нийт 651.1 у/м дам нуруут гүүрний ажил 37 хувийн гүйцэтгэлтэй, далан байгуулах ажил 14.2 хувь, газар шорооны ажил буюу ухмал байгуулах ажил 34.3 хувийн гүйцэтгэлтэй, бүх ажил төлөвлөгөөт графикийн дагуу явж байгааг төслийг хэрэгжүүлэгч байгууллага буюу “Монголын Төмөр Зам” ТӨХК-ийн удирдлагууд хэлжээ.