“Ирээдүйн номын сан” төслийн 12 дахь зохиолчоор Амитав Гош тодорлоо. Түүний гар бичмэлийг 89 жилийн турш буюу 2114 он хүртэл уншигчдаас нууцлах болно гэж The Guardian мэдээллээ. Ингэснээр зөвхөн ирээдүйн хүн төрөлхтөн л унших боломжтой зохиол нэгээр нэмэгдэх юм.

Учир нь нэгэн зууны дараа үүдээ нээх “Ирээдүйн номын сан" бол жил бүр онцгой зохиолчдын эх бичмэлийг шилэн авч, чандлан хадгалах зорилготой төсөл.  Үүнийг шотланд уран бүтээлч Кэти Петерсон 2014 онд санаачилжээ. Тэрээр Осло хотын умард хэсэгт мянган гацуур тарьсан. Моддыг “Ирээдүйн номын сан”-гийн 100 антологи бүтээлийг хэвлэх цаасанд зориулж 2114 он хүртэл ургуулах юм байна.

Төсөлд оролцох урилга авсан Гош үүнийгээ “гүн хүндэтгэл, итгэл хүлээсэн үйл явдал боллоо” гэж тодорхойлоод,  тус санаачилга нь “дэлхийд төрөө ч үгүй уншигчдад зориулж туурвихын тулд амьдрах хязгаараасаа давж сэтгэх ёстойг бидэнд сануулж байна” гэжээ.

Тэрээр “Төслийн үндэс ой мод болж буй нь  надад онцгой ач холбогдолтой. Учир нь би Сундарбан гэж алдаршсан агуу их мангровын ойн тухай олон жилийн турш бичиж байна” хэмээсэн.

Ганга мөрний бэлчрээр сунаж тогтсон Сундарбан нуруун тэртээ Гошийн "Өлсгөлөн түрлэг", "Ширэнгэн ой-Нама ", "Гуны арал” зэрэг романы үйл явдал өрнөдөг.

Ингэснээр зөвхөн ирээдүйн хүн төрөлхтөн л унших боломжтой зохиол нэгээр нэмэгдэх юм.

Уур амьсгалын өөрчлөлт, гамшгийн тухай голцуу бичдэг тэрээр "Эх дэлхий туйлдталаа хямарсан энэ үед, байгаль, уран зохиол, тэвчээр гурвыг агуу өргөн цар хүрээнд холбосон төслийн нэг хэсэг болсондоо сэтгэл минь хөдөлж байна” гэсэн юм.

Зохиолч 2026 оны хаврын сүүл, зуны эхэн сард “Ирээдүйн номын сангийн” гацуур модон төгөлд эх бичмэлээ гардуулах  ёслолын үеэр бүтээлийнхээ нэрийг зарлана.

Амитав Гош бол орчин цагийн хамгийн алдартай энэтхэг зохиолчдын нэг. Тэрээр өөрийн бүтээлүүдэд Энэтхэгийн түүхийн харанхуй бурангуй үеийн тухай, эх нутаг нь хэсэг хэсгээрээ хэрхэн колоничлогдож байсан тухай илчлэн өгүүлсэн. Мөн уур амьсгалын өөрчлөлт, хямралын аюулыг байнга хөндөж бичдэг байна.

Одоогоор Маргарет Атвуд, Дэвид Митчелл, Хан Ган, Оушен Вуонг болон дэлхийн бусад алдартай зохиолчид “Ирээдүйн номын сан” төсөлд нэгджээ. Тэдний гар бичвэрийн ганц, ганцхан хувийг өнөөг хүртэл Норвегийн нийслэл Осло хотын нийтийн номын сангийн "чимээгүй өрөөнд" тусгайлан хадгалж байна. Тэдгээр бүтээлийг 2114 онд л хэвлэх тул, тэр болтол  хэн ч унших боломжгүй юм.

Эх сурвалж: The Guardian

Орчуулсан: Э.Болор-Од