УИХ-ын чуулганы пүрэв /2025.06.19/ гарагийн нэгдсэн хуралдаан эхэллээ.   

Пүрэв гарагийн нэгдсэн чуулганаар хэлэлцэх асуудлууд: 

• Хот байгуулалтын тухай хууль /Шинэчилсэн найруулга/-д нэмэлт оруулах тухай хуулийн төсөл болон хамт өргөн мэдүүлсэн хуулийн төслүүд /Улсын Их Хурлын гишүүн Ж.Алдаржавхлан 2025.05.02-ны өдөр өргөн мэдүүлсэн, хэлэлцэх эсэх, үргэлжилнэ/
• Хууль тогтоомжийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хууль, тогтоолын төслүүд /Улсын Их Хурлын гишүүн Д.Цогтбаатар нарын 9 гишүүн 2025.01.23-ны өдөр өргөн мэдүүлсэн, анхны хэлэлцүүлэг, үргэлжилнэ/
• Төрийн албаны зөвлөлийн гишүүнийг томилох, чөлөөлөх тухай асуудал
• “Засгийн газарт чиглэл өгөх тухай” Улсын Их Хурлын тогтоолын төсөл
• Эрүүгийн хэрэг хянан шийдвэрлэх тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төсөл /Засгийн газар 2024.12.27-ны өдөр өргөн мэдүүлсэн, анхны хэлэлцүүлэг, асуулт, хариулт 90 минут/
• Нийгмийн даатгалын ерөнхий хуульд нэмэлт, өөрчлөлт оруулах тухай хуулийн төсөл /Улсын Их Хурлын гишүүн Б.Түвшин нарын 41 гишүүн 2025.05.09-ний өдөр өргөн мэдүүлсэн, хэлэлцэх эсэх, асуулт, хариулт 150 минут/

ТӨРИЙН АЛБАНЫ ЗӨВЛӨЛИЙН ГИШҮҮНЭЭР Л.ЗОЛЗАЯА, Ц.АМАРТӨГС, Б.ТӨГСЦЭНГЭЛ НАРЫГ НЭР ДЭВШҮҮЛЛЭЭ

Чуулганы нэгдсэн хуралдаанаар Төрийн албаны зөвлөлийн гишүүнийг томилох, чөлөөлөх тухай асуудлыг хэлэлцэж байна. Төрийн албаны зөвлөлийн гурван гишүүний бүрэн эрхийн хугацаа дууссантай холбоотойгоор:

• Цэнддаваагийн Амартөгс
• Бадамдоржийн Төгсцэнгэл
• Лхагвасүрэнгийн Золзаяа нарыг нэр дэвшүүлжээ.

Ерөнхийлөгчийн тамгын газраас Төрийн албаны зөвлөлийн гишүүнээр Л.Золзаяаг дэвшүүлэх санал оруулсан байна. 

Л.Золзаяа нь:

1977 онд Улаанбаатар хотод төрсөн. Эхнэр, хоёр хүүхэдтэй. 1995 онд нийслэлийн 45-р дунд сургууль төгссөн. 1997-2001 онд Тагнуулын ерөнхий газрын дээд сургуульд суралцан төгсөж, эрхзүйч мэргэжил эзэмшсэн. Бизнесийн удирдлагын магистр зэрэгтэй.

Ажилласан байдал:

• Тагнуулын ерөнхий газарт ажилтнаар ажлын гараагаа эхэлж, 2001-2005 орон нутгийн нэгжид ажилтан
• 2005-2011 онд- ТЕГ-ын Төвийн нэгжид ажилтан, тасгийн дарга, хэлтсийн орлогч дарга
• 2011-2013 онд- АТГ-т ахлах ажилтан
• 2013-2015 онд- ТЕГ-ын орлогч дарга
• 2015- 2019 онд Монгол Улсаас БНХАУ-д суугаа ДТГ-т  
• 2019-2023 онп Тайпэй дахь Улаанбаатарын Худалдаа, эдийн засгийн төлөөлөгчийн газрын тэргүүн
• 2023-2025 онд ТЕГ-ын орлогч дарга
• 2025 оны 3-р сараас Ерөнхийлөгчийн Тамгын газрын Хуулийн бодлогын газрын ахлах референтээр ажиллаж байна.

Тэрбээр ҮАБ, гадаад харилцааны чиглэлээр ажилласан төрийн албаны туршлагатай хэмээн үзэж, ТАЗ-ийн гишүүнээр ажиллуулахаах нэр дэвшүүлж байна гэж Ерөнхийлөгчийн зөвлөх Г.Ганболд танилцуулав.

УИХ-ын гишүүн Б.Уянга, Ирэх жил эмч, багшаас бусад төрийн албан хаагчдыг 9 хувиар цомхтгож, 14400 хүнийг ажлаас чөлөөлнө гэж байна.

Төрийн албаны тухай хуулийн 62.1.4-рт “Төрийн байгууллага татан буугдах, өөрчлөн байгуулагдах, өөрөөс үл хамаарах шалтгаанаар орон тооны цомхтголоор хасагдсан тохиолдолд: 

• Цалин хөлсөө бууруулахгүйгээр өөр орон тоо, албан тушаалд шилжих
• Эсвэл төрийн хөрөнгөөр 6 сарын хугацаанд дахин мэргэших, энэ хугацаанд урд нь эрхэлж байсан албан тушаалынхаа цалин хөлсийг авч, хууль тогтоомжийн дагуу ажлын байраар хангуулах
• Эсвэл 3 сарын цалинтай тэнцэх хэмжээний нэг удаагийн тэтгэлгийг тухайн байгууллагаасаа авна” гэж заасан. Тэгэхээр энэ хуулийн заалт хэрэгжих байх.

14 мянган төрийн албан хаагчийг цомхтгох болсон шалтгааныг давхардсан орон тоо их байна гэж тайлбарлаж байна. Төрийн албаны зөвлөлөөс албан тушаалын тодорхойлолт гаргаж баталдаг. Баталж байгаа учир давхардлыг харах ёстой. Миний бодлоор ТАЗ-ийн хариуцлагагүйтэй холбоотой мэт харагдаж байна гээд энэ талаар ямар бодолтой байгааг ТАЗ-ийн гишүүн нэр дэвшигчдээс асуув.



Нэр дэвшигч Н.Төгсцэнгэл, Төрийн албан хаагчдыг цомхтгох бодлого, зорилтыг хэрэгжүүлэхдээ төсөв, хүний нөөц, бүтэц оновчлол талаасаа нөхцөл байдлыг цогцоор нь харах шаардлагатай. Төрийн албан хаагчдыг бууруулах замаар төсөв хэмнэх зорилго тавьж байгаа бол урсгал зардлыг нарийвчлан судалж, бусад зардлын бүтцийг нарийвчлан судалж, илүү оновчтой шийдвэрийг хамтад нь гаргах нь зүйтэй.

Төрийн албанд одоогоор 226859 албан ажиллаж байна. Албан хаагчдын цалин хөлс төсвийн урсгал зардлын 19.4 хувийг эзэлж байна. Цалин хөлсний зардал урсгал зардлын 13.6 хувийг эзэлж байгаа тул нийт төсвийн үр ашигт үзүүлэх нөлөө хязгаартай байж болох юм.

Төрийн албан хаагчдын тоог 9 хувиар бууруулахад хүний нөөц талаас 14400 орчим хүний ажлын байрыг хөндөх тул энэ шийдвэрийг хэрэгжүүлэх хүрээ, тогтолцоо, хаанаас нь, ямар зарчмаар гэсэн нарийн төлөвлөлт хийх шаардлагатай гэж бодож байна. Бүтцийн оновчлол талаасаа төрийн үйлчилгээ хэвийн, тасралтгүй хүргэхэд зайлшгүй шаардлагатай албан тушаал, орон тооны тооцооллыг эхний ээлжинд хийх шаардлагатай.

Үүний дараа чиг үүргийн давхардалтай, төрийн зайлшгүй өөрөө гүйцэтгэх шаардлагагүй гэж үзсэн, хувийн хэвшилд шилжүүлэх боломжтой албан тушаалууд гэх мэтээр зөв суурьтай тооцоотой оновчтой шийдэл, бодлогыг хэрэгжүүлэх ёстой.

Хүний нөөцийн цомхтголтой холбоотой дагаж олгох тэтгэмж, НДС-гаас олгох халамжийн зардал нэмэгдэх тул зардлыг урьдчилан тооцож, хэмнэлт хийхдээ харьцуулсан тооцоо гаргаж, хариуцлагатай хандах ёстой гэв.