ЭМЯ-ны Төрийн захиргааны удирдлагын газар, Эмнэлгийн тусламж үйлчилгээний газрын холбогдох албан тушаалтнууд энэ сарын 22-нд Өрхийн эрүүл мэндийн төвүүдэд ажиллажээ. Тодруулбал Сүхбаатар дүүргийн Ачит гар, Тэгш мэнд,  Энэр—Ази, Сонгинохайрхан дүүргийн Баянбигэр, Цэцэгхайрхан,  Хан-Уул дүүргийн Чанд авиа, Баянзүрх дүүргийн Өнөр энх мэнд, Энх-Агшин, Оч манал, Баянгол дүүргийн Усан түрүү, Учрахуй Өрхийн эрүүл мэндийн төвд ажиллажээ.

ӨЭМТ тус бүр ор зохицуулах багт долоо хоногт 20-30 хүнийг илгээдэг. Орны хүлээгдэл дунджаар хоёр хоног байгаа аж. Тэдгээрт 2-4 эмч, эмнэлгийн мэргэжилтэн ажиллаж байсан байна. Өрхийн эрүүл мэндийн төвийн үндсэн тусламж үйлчилгээ, ковидын хариу арга хэмжээний тасралтгүй байдлыг хангах, өвчтөний эрэмбэлэн ангилалт, дархлаажуулалтын үйл ажиллагаанд анхаарч ажиллах чиглэлийг өрхийн эрүүл мэндийн төвийн удирдлагуудад өглөө.

Өрхийн эрүүл мэндийн төвүүд өдөрт 30-50 ковид-19 халдвартай иргэнийг эрэмбэлэн тусламж үзүүлж, насанд хүрэгчдийн болон хүүхдийн эмийн багцыг олгож байна. Гэвч эмч ажилчдын 35 хувь нь коронавирусийн халдвар авсны улмаас  хүний нөөцийн дутагдалтай байгааг энэ үеэр хэлж байв.

Ажлын өдрүүдэд Эрүүл мэндийн Сайдын тушаалаар 2-3 резидент эмч дайчлагдан ажиллаж, ачааллыг хуваалцаж байна.