100 буудалт даамны сонирхогчдын улсын аварга шалгаруулах тэмцээн энэ сарын 18-19-нд боллоо.

Дөрөв дэх жилдээ зохиогдсон тус тэмцээнийг Монголын даамын холбоо, Нийслэлийн даамын холбоо, Монголын хараагүйчүүдийн үндэсний холбоо хамтран зохион байгуулжээ.

Тэмцээнд 15 аймаг, нийслэлийн 7 дүүргийн эрэгтэй 148, эмэгтэй 46 даамчин ухаанаа уралдуулсан бөгөөд оролцогчдыг цол зэргээр нь ангилбал дэд мастер цолтон 81, I зэрэгтэй тамирчин 58, II зэрэгтэй тамирчин 11, III зэрэгтэй тамирчин 10, зэрэггүй тамирчин 34 байв.

Швейцар системээр 9 өрөг тоглож дүнгээ гаргахад эмэгтэй ангилалд дэд мастер Д.Наранмишээл (“Ирээдүй” клуб) 14 оноогоор түрүүлж, дэд мастер Д.Даваадэжид (“Сонгодог байрлал” клуб) 14, дэд мастер Б.Билгүүндарь (Баянхонгор) 13 оноогоор мөнгө, хүрэл медалийн эзэд боллоо.

Харин эрэгтэй ангилалд 2019 оны алтан медальт дэд мастер Ё.Бат-Өлзий (Говьсүмбэр) 15 оноогоор аваргалж, сонирхогчдын улсын хошой аварга боллоо. Мөнгөн медалийг Л.Нэргүйбаатар (Увс) 15, хүрэл медалийг дэд мастер Т.Дагвадорж (Баянхонгор) 14 оноогоор хүртсэн.