Их Британи улс даяар III Чарльз хааныг сэнтийд заларсныг ням гарагт үргэлжлүүлэн тэмдэглэжээ. Энэ өдөр тус улсын өнцөг булан бүрд хүмүүс үдийн зоог барьж, үдэшлэг зохион байгуулж, дэлхийд алдартай оддын тоглолтоор хоёр дахь өдрийг дуу хуур, хөөр баяртайгаар тэмдэглэн өнгөрүүлжээ.

Хааны гэр бүл бүтэн өдрийн турш баярын үйл ажиллагаануудад оролцсон бөгөөд өдрийн төгсгөлд Виндзорын шилтгээнд болсон тоглолтыг үзсэн байна. Тоглолтод алдарт дуучин Кэти Перри болон Take That  хамтлагийнхан,  дуучин Лайонел Ричи, Олли Мурс, Палома Фейт зэрэг дуучид ая дуугаа өргөжээ. 

Мөн Хааны балет болон Хааны дуурийн театр, Хааны Шекспирийн чуулга, Хааны хөгжмийн коллеж, Хааны урлагийн коллежийн хамтарсан тоглолт болсон байна.

Бямба гарагт титэм залах ёслол болсны дараа хаан Чарльз, хатан Камилла нар Букинхэмийн ордондоо буцаж очоод хааны гэр бүлийн бусад гишүүдийн хамт тагтан дээр гарч ирж, иргэдтэйгээ мэндчилсэн юм. Ордны тагтан дээрх хааны гэр бүлийн гишүүдийн дунд Сассексийн гүн ханхүү Харри байгаагүй бөгөөд ВВС-гийн мэдээлснээр түүнийг уриагүй байна.

Ханхүү Харри Калифорниос Лондон хотод аавынхаа хаан сэнтийд залрах ёслолд хүрэлцэн ирсэн бөгөөд түүний эхнэр Меган бага насны хоёр хүүхдийн хамт гэртээ үлджээ. Вестминстерийн сүмд болсон ёслолын үеэр тэрээр ах Уэльсийн ханхүү Уиллиамаас хоёр эгнээний зайтай суусан байна. Энэ нь гэр бүлийн гишүүдтэйгээ үл ойлголцсон тухай өгүүлсэн "Spare" дурсамж номоо гаргаснаас хойш тэдэнтэй хамт олны өмнө гарч байгаа анхны тохиолдол нь юм. Харригийн хүү Арчигийн дөрвөн насны төрсөн өдөр мөн тухайн өдөр тохиосон тул хүүгийнхээ төрсөн өдрийг тэмдэглэхээр ёслолын ажиллагааны дараа сүмээс гараад шууд АНУ руу ниссэн байна.