• "Чандраян-3" хөлөг сарны гадаргуу дээр амжилттай газардав
• Хөлөг 14 хоногийн хугацаанд судалгаа хийнэ
• Хүхрээс гадна өөр олон химийн элементийг илрүүлжээ

Өнгөрсөн долоо хоногт Энэтхэг улсын “Чандраян-3” хөлөг сарны гадаргуу дээр амжилттай газардсанаар саран дээр буусан дөрөв дэх (АНУ, ОХУ, Хятадын араас), сарны өмнөд туйлд буусан анхны улс болсон юм. 

Сарны өмнөд туйлыг судлах зорилготой тус хөлөг судалгааны явцдаа хүхэр болон өөр химийн элементүүдийг илрүүлснээ мэдэгдлээ.

Энэтхэгийн Сансар судлалын байгууллага цахим хуудсандаа сарны гадаргуугаас хөнгөн цагаан, төмөр, кальци, хром, титан, манган, хүчилтөрөгч, цахиур зэргийг илрүүлсэн хэмээн нийтэлсэн байна.

“Чандраян-3” хөлөг 14 хоногийн хугацаанд судалгаа хийх бөгөөд ирээдүйн сансрын нисгэгчдийн судалгаа болон пуужингийн түлш хийхэд тус болох магадлалтай “хөлдсөн ус” хайж байгаа юм. Мөн сарны гадаргуу болон газар хөдлөлтийн идэвхийг судална гэдгийг Сансар судлалын байгууллагын захирал С.Сомнат хэлэв.
Эх сурвалж: Ассошиэйтед Пресс