PISA судалгаанд хамрагдах сургууль, сурагчдыг түүврийн аргаар сонгосон бөгөөд шалгалт 2022.04.11-05.14-ний өдрүүдэд болж, манай улсын 196 сургуулийн 7276 сурагч хамрагдсан юм.

Энэ нь Компьютерт болон цаасанд суурилсан хэлбэрээр явагддаг. Манай улсын тухайд компьютерт суурилсан хэлбэрээр анхны үнэлгээнд хамрагдсан.

PISA үнэлгээг 3 жил тутамд зохион байгуулдаг нь тухайн улсын боловсролын тогтолцоонд гарч буй өөрчлөлтийг тодорхойлоход тохиромжтой хугацаа гэж үздэгтэй холбоотой.

PISA-гийн үр дүн нь боловсролын систем, тэр дундаа боловсролын мэргэжлийн байгууллагуудад найдвартай мэдээллийн эх сурвалж бүрдүүлж өгнө. Тухайлбал Боловсролын үнэлгээний төвд PISA-гийн даалгаврын тавилтай уялдуулж үнэлгээний хэрэгсэл боловсруулах туршлага хуримтлагдана. Түүгээр дамжуулж шинжлэх ухааны мэдлэгээ хэрхэн ашиглаж байгаа талаар сурагчдын чадварыг үнэлэх даалгаврын сан бүрдүүлэх боломж нээгдэх юм.

БШУ-ны сайд Л.Энх-Амгалан "Маш эмзэг бөгөөд бид анхаарлаа хандуулах шаардлагатай хэд хэдэн асуудал байгаа нь харагдлаа.

Монгол улсад төрийн болон хувийн сургуулийн гүйцэтгэлийн ялгаа хөл зөрүүгүй байна. Өөрөөр хэлбэл өндөр төлбөр төлөөд сурч байгаа хүүхэд өгөөжөө хүртэхгүй байгаа гэсэн үг буюу төрийн сургуульдаа явсан ч ижил үзүүлэлттэй байхаар байна.

10 хүүхэд тутмын 6 нь буюу 64 хувь нь унших чадвар бүрэн эзэмшээгүй байна.

Монгол сурагч хүүхдүүдийн амьдралын сэтгэл ханамж 7,2 буюу Азийн дунджаас дээгүүр байгаа нь давуу тал юм. 2022 оны судалгааг эхлэхийн өмнө үдийн цайг үдийн хоол болгосон нь нөлөөлсөн байх магадлалтай. Мөн цар тахлын дараа ЕБС-иудад сэтгэлзүйч ажиллуулж, үе тэнгийн дээрэлхэлтийн талаар шүгэл үлээж, орон нутгийн ариун цэврийн байгууламжийг сайжруулсан гэх мэт ажлууд нөлөөлсөн.

Харин сурагчдын математикийн ур чадварын түвшинг тодорхойлоход 15 настай хоёр хүүхдийн нэг нь суурь түвшиндээ хүрэхгүй байгаа ч нийт 7300 хүүхдийн 2,3 хувь нь буюу 160 хүүхэд дэлхийн гүйцэтгэлээс өндөр гарсан нь сайшаалтай.

Сурагчдын унших чадварыг тодорхойлоход 10 хүүхэд тутмын 6 нь буюу 64 хувь нь унших чадвар эзэмшээгүй байна. Мөн 3 хүүхэд тутмын 2 нь суурь түвшиндээ хүрэхгүй байгаа тул унших чадварыг нэмэгдүүлэх зайлшгүй шаардлага үүссэн нь харагдаж байна. Унших чадвар нь ойлгож, эргэцүүлж уншиж чадаж байна уу, эсээ бичиж, өөрийгөө илэрхийлж чадаж буйг шалгадаг үзүүлэлт юм.

Монгол Улс математикийн ерөнхий дүнгээр PISA-ийн үнэлгээнд хамрагдсан 81 орноос 47 дугаарт, анх удаа орж байгаа 6 орноос 1 дүгээр байрт тус тус оржээ. Гэхдээ бид математикийн үнэлгээгээр бусад орноос 2.3 жил, Азийн орнуудаас 1.2 жилийн хоцрогдолтой байна" гэлээ.

Сайд Л.Энх-Амгалангийн танилцуулгын дэлгэрэнгүйг ЭНД дарж хүлээн авна уу.