Монгол түмний сэтгэлд хоногшсон сайхан дуу "Чингис хаан" одонт Төрийн соёрхолт, Урлагийн гавьяат зүтгэлтэн Б.Шаравын ая, Ардын уран зохиолч Т.Галсангийн үг "Аав ээж хоёр минь" дууг мөнхжүүлж гэрэлт хөшөө босголоо.

Дуунд зориулсан хөшөөг Байгалийн түүхийн музейн өмнөх талбайд өнгөрсөн бямба гарагт байрлуулсан бөгөөд энэ арга хэмжээнд уг дууг бүтээсэн уран бүтээлчид, энэ уран бүтээлийг дуулж Монгол түмний хүртээл болгосон Ардын жүжигчин А.Долгор тэргүүтэй уран бүтээлчид оролцлоо.

Энэ дууг хүндэтгэн хөшөө босгох санаачилгыг УИХ-ын гишүүн, Хууль зүй, дотоод хэргийн сайд Ц.Нямдорж гаргасан бөгөөд түүний найранд дуулдаг ганц дуу нь гэдгийг ард түмэн андахгүй болжээ.

“Аав ээж хоёр минь” дууг хөгжмийн зохиолч Б.Шарав 1985 онд ЗХУ-ын Ардын жүжигчин, Буриадын нэрт дуучин Дугаржав Дашиевт зориулан зохиожээ. Удалгүй Москвагийн радиод тегелдер хуурч Ардын жүжигчин Ж.Тувааны Цолмон, Д.Дашиев нар бичүүлсэн байдаг. Харин эх орондооо анх дуулж түмний хүртээл болгосон дуучин бол Төрийн шагналт, Ардын жүжигчин, Зууны манлай дуурийн дуучин Хорлоогийн Уртнасан юм. Уртнасан маань тегелдер хуурч Лхамсүрэнгийн Замбагатай Монголын радиогийн Алтан фондод бичүүлжээ.


Түүнээс хойш Ардын жүжигчин А.Загдсүрэн, Ардын жүжигчин Б.Жавзандулам, Ардын жүжигчин А.Долгор , Гавьяат жүжигчин А.Бүтэд, Гавьяат жүжигчин О.Ичинхорлоо, Гавьяат жүжигчин Г.Жанчив, Гавьяат жүжигчин П.Ганбат, Гавьяат жүжигчин Э.Амартүвшин, Гавьяат жүжигчин Г.Ариунбаатар болон өнеегийн олон сайхан алдар цолтой дуучид, авьяаслаг залуучууд, рок попын дуучид дуулж байна. Энэ бүтээл олон улсын уралдаанд байнга дуулагдаж, Орос, Хятад, Япон, Солонгос гээд дэлхийн олон улсын мэргэжлийн дуучдын урын санд орсон "Аав ээж хоер минь" дуу 35 жил сонсогчдын талархлыг хүлээн хорвоод ганцхан заяах юутай ч зуйрлэшгүй ачит аав ээжийгээ хайрлах сургамж болсоор байна” хэмээн хөгжим судлаач Ч.Буянхишиг ярилаа.

1999 онд Төрийн шагналт, Ардын жүжигчин Цэгмидийн Намсрайжав, Соёлын гавьяат зүтгэлтэн Жамцын Бадраа нарын зохиол Зууны манлай нийтийн дуу "Халуун элгэн нутаг" дуунд анх хөшөө босгосноос хойш "Буянт гол", "Зулай цагаан Алтай", "Маамуу нааш ир", " Түүхт хил", "Нисэгчийн дуу", "Сүүн цагаан хурим" дуу хөшөөтэй болсон. Монгол түмний дуулах дуртай “Аав ээж хоёр минь” дуу 34 дэх жилдээ хөшөөнд мөнхрөн үлдлээ.

Дуурь, бүжгийн эрдмийн театрт болсон дууны хөшөөний нээлтэд зориулсан ёслол хүндэтгэлийн арга хэмжээний үеэр ХЗДХ-ийн сайд Ц.Нямдорж энэ сайхан дууг зохиосон Төрийн соёрхолт, Урлагийн гавьяат зүтгэлтэн Б.Шарав, Ардын уран зохиолч Т.Галсан, "Аав ээж хоёр минь" дууг олон жил дуулж буй Ардын жүжигчин А.Долгор болон бусад уран бүтээлчдэд хөшөөний жижигрүүлсэн загварыг дурсгал болгон хадгалуулав.

Энэ үеэр монгол түмний сэтгэлд хоногшсон “Аав ээж хоёр минь” дууг ДБЭТ-ын гоцлол найрал дуучид найрал хегжмийн хамт тус театрын еренхий удирдаач, Урлагийн гавьяат зүтгэлтэн Т.Туулайхүүгийн удирдлагаар дуулж сонирхууллаа.