Цэвэр агаар сан болон 2008-2016 онд агаарын бохирдлыг бууруулах чиглэлээр гадаад, дотоодын хөрөнгөөр хийгдсэн ажлуудын үр дүнг танилцуулж байна.  

Төсөл хөтөлбөрүүдээс түүвэрлэн шалгахад нийт 72 зөрчил илрүүлжээ. Агаарын бохирдлыг бууруулах эрхзүйн зохицуулалт, чиг үүргийн зохион байгууллат уялдаа холбоогүй, хэрэгжүүлэгч болон хяналт тавих байгууллагуудыг нэгдсэн удирдлагаар хангаагүй, хэрэгжилтэд хангалттай хяналт тавиагүй, үр дүнг нэгтгэн дүгнээгүй, хөндлөнгийн байгууллагаас хийсэн хяналт шалгалтын мөрөөр ажиллаж, арга хэмжээ аваагүй байна гэж аудитын тайланд дурджээ.    

Иймд зарим зөрчлийг хууль хяналтын байгууллагад шилжүүлсэн байна.

Шалгалтыг тэргүүлэх аудитор Л.Одгэрэл удирдан, чанарын хяналтыг аудитын менежер Л.Эрдэнэчулуун хэрэгжүүлжээ.

Аудитын ажлыг ахлах аудитор Д.Гандолгор, аудитор Б.Булган, Э.Уянга, М.Гүнжмаа, Б.Лхагвацэрэн нар энэ оны зургаадугаар сарын 30-наас наймдугаа сарын 30-нд гүйцэтгэсэн байна.    

Аудитын дүгнэлттэй уялдаж, Ерөнхий сайд буюу Орчны бохирдлыг бууруулах үндэсний хорооны дарга, БОАЖ-ын сайд, Сангийн сайд,  хотын дарга нарт зөвлөмж хүргүүлжээ. Зөвлөмжид агаар, орчны бохирдол өсөж байгааг царцаах, бууруулах чиглэлээр хоёр үе шаттай ажлыг нэгдсэн бодлого, хяналт дор явуулахыг үүрэг болгосон байна.

АУДИТАД ТУЛГАРСАН БЭРХШЭЭЛТЭЙ АСУУДЛУУД

Цэвэр агаар сан (ЦАС) татан буугдсантай холбоотойгоор АББҮХ-ны тогтоол болон БОАЖС-ын тушаал зэрэг эрх зүйн шийдвэр болон архивын баримт материал бүрэн бус, тус сангаас зарцуулсан хөрөнгө, ТАХ-ний үр дүн, үр нөлөөний талаар хяналт хийж, үр дүнг үнэлж байсан эсэх талаар баримт материал олдоогүйгээс ЦАС-ийн үйл ажиллагааг үнэлж, дүгнэхэд бэрхшээлтэй байлаа.

Салбар хариуцсан яам, агентлаг, газрын бүтэц, зохион байгуулалт болон тухайн үед ажил үүргийг хариуцаж байсан удирдах болон гүйцэтгэх албан тушаалтнууд өөрчлөгдсөн, НАББГ-аас Улаанбаатар хотын агаарын бохирдлын эх үүсвэрийн судалгааг зөвхөн 2015 оны байдлаар өгсөн, өмнөх жилүүдийн судалгааг гаргаж ирүүлээгүй зэрэг нь аудитыг төлөвлөсөн хугацаанд гүйцэтгэхэд хүндрэлтэй байжээ.

Үндэсний аудитын газраас албан ёсоор шаардсан болон аудитын явцад шалгагдагч болон холбоотой талуудаас хүссэн гүйцэтгэлийн зарим мэдээлэл, тайлбар иж бүрэн бус, дүн шинжилгээ хийх боломжгүй, аудитын стандартын дагуу баримтат нотолгоо болгох үндэслэл, баталгаа сул, гүйцэтгэлийн мэдээллийн чанар хангалтгүй байжээ.