“Талст маргад” компанийн лицензийг цуцлах эсэхтэй холбоотой шүүх хурал өчигдөр Нийслэлийн шүүхэд болох байсан ч шүүх хурлыг 14 хоногийн дараа болгохоор хойшлууллаа.

“Хөвсгөл далайн эзэд”, “Хүний эрх хөгжил” төвөөс Хөвсгөл аймгийн Бүрэнтогтох сум, Бүрэнхааны фосфоритын ордод олгогдсон лицензүүдийг цуцлуулахаар орон нутгийн иргэдийг төлөөлж Нийслэлийн Захиргааны хэргийн шүүхэд хандаад байсан юм.

Хэргийн хариуцагчаар нь Ашигт малтмалын газар, гуравдагч этгээдээр ашигт малтмалын тусгай зөвшөөрөл /лиценз/ эзэмшигч “Сутайхэнцо”, “Талст маргад” компаниуд татагдаад байгаа аж.

Маргаан бүхий лиценз эзэмшдэг “Сутайхэнцо” компанийн эзэмшигч нь нас барсан учир тус компанийн төлөөлөгч томилогдох хүртэл хэргийг түдгэлзүүлэх шийдвэр гарсан байна. Тиймээс нэхэмжлэгчид “Сутайхэнцо” компанид холбогдох хэсгээс татгалзан, хэргийг сэргээж “Талст маргад” компанийн лицензийг цуцлуулахаар гомдол гаргаад байгаа юм.

Дээрх хэргийг шүүхийн хуралдаан хоёр ч удаа зарлагдсан ч хариуцагчийн зүгээс “Эрдэс баялаг эрчим хүчний яам Уул уурхайн яам болон өөрчлөгдсөнтэй холбоотойгоор харъяа агентлагуудын бүтэц даган өөрчлөгдөж байгаа. Ашигт малтмалын газрыг уг хэрэгт төлөөлөн оролцох этгээдийг хараахан томилогдоогүй байгаа тул томилогдох хүртэл шүүх хуралдааныг хойшлуулж өгнө үү” гэсэн хүсэлтийн дагуу шүүх хурал хойшиллоо.

О.Эрдэнэ