Нийслэлийн хэмжээнд Сонгуулийн санал авах 397 байр 07:00 цагаас эхлэн ажиллаж эхэллээ.

Тэдгээрийн нэг болох, УИХ-ын 2016 оны сонгуулийн 63-р тойргийн 1-р хэсгийн болон НИТХ-ын 2016 оны сонгуулийн 37-р тойргийн санал авах байр буюу Нийслэлийн 23-р дунд сургуулиас сонгуулийн үйл ажиллагааны нээлтийг GоGо мэдээний агентлаг шууд дамжуулан хүргэж байна. 

Энэхүү тойрог нь Чингэлтэй дүүрэгт хамрагддаг бөгөөд сонгууль өгөх насны 11122 иргэн бүртгэлтэй аж. Харин орон даяар нийт 1 сая 912 мянга 901 сонгогч сонгогчдын нэрийн жагсаалтад бүртгэгджээ. Тодруулбал,

Бусад дүүрэгт:

• Баянзүрх дүүрэгт               -220,130 буюу нийт сонгогчдын 23.8 хувь
• Сонгино хайрхан дүүрэг   - 205,276 буюу нийт сонгогчдын 22.2 хувь
• Баянгол дүүрэгт                 -140,846 буюу нийт сонгогчдын 15.2 хувь
• Чингэлтэй дүүрэгт              -111.022 буюу нийт сонгогчдын 12.0 хувь
• Хан-Уул дүүрэгт                 -105.874 буюу нийт сонгогчдын 11.5 хувь
• Сүхбаатар дүүрэгт             -96.265  буюу нийт сонгогчдын 10.3 хувь
• Налайх дүүрэгт                  -23,976 буюу нийт сонгогчдын 2.5 хувь
• Багануур дүүрэгт               -19,442 буюу нийт сонгогчдын 2.1 хувь
• Бага хангай дүүрэгт           -2,798 буюу нийт сонгогчдын 0.3 хувь

Эхлээд санал тоолох хоёр төхөөрөмжийн лацыг авч, тэг тайланг гаргаж ажиглагчдад хүлээлгэн өглөө. Зөөврийн хайрцгаар авсан саналыг санал тоолох төхөөрөмжид уншуулсаны дараа сонгогчдоо хүлээн авах журамтай. Тиймээс зөөврийн хайрцгаар ирсэн нийт 23 саналын хуудсыг гарган санал тоолох төхөөрөмжид уншуулж дууссаны дараа биеэр ирж санал өгөх иргэд орж саналаа өгч эхэллээ.

Тус сонгуулийн байранд нэг ахлах зохион байгуулагч, дөрвөн зохион байгуулагч, нэг мэдээлэл, технологийн даамал, 23 ажиглагч, хоёр улсын бүртгэлийн ажилтан, нэг цагдаагийн албан хаагчийн бүрэлдэхүүн ажиллаж байна.

СОНГУУЛЬ ӨГӨХ ЗААВАР: Иргэд санал өгөх байранд орж ирэн хуруугаа уншуулаад нэрээ бүртгүүлж саналын хуудсаа авна. Дараа нь бүхээгт орж саналын хуудсаа бөглөн санал тоолох төхөөрөмжид саналын хуудсаа хийн уншуулна.

Иргэдийн саналыг өнөөдөр 22:00 цаг хүртэл авах бөгөөд ТА БҮХЭН СОНГУУЛЬДАА ИДЭВХТЭЙ ОРОЛЦООРОЙ!

Та саналаа хаана өгөхөө мэдэхгүй байгаа бол ЭНД дарж дэлгэрэнгүй мэдээлэлтэй танилцана уу. 

УИХ-ын 2016 оны сонгуулийн 63-р тойргийн 1-р хэсгийн болон НИТХ-ын 2016 оны сонгуулийн 37-р тойргийн Ахлах зохион байгуулагч Д.Батцогт:

Энэ жилийн сонгуулийн бэлтгэл ажил хэр байв?
Бэлтгэл ажил 100 хувь хангагдсан. Заалны хувьд хангалттай том зааланд явагдаж байна. Энэ жилийн хувьд олон ажиглагч сууж байгаа гэдгээрээ онцлогтой. Нийслэлээс найм, УИХ-н нам болон бие даагчдыг төлөөлж 15 ажиглагч буюу нийт 23 ажиглагч сууж байна. Мөн нэг ахлах зохион байгуулагч, мэдээлэл технологийн нэг даамал, дөрвөн зохион байгуулагч, хоёр иргэний бүртгэлийн ажилтан, нэг цагдаагийн албан хаагч гэсэн бүрэлдэхүүнтэй ажиллаж байна.

63-р тойргийн 1-р хэсгийн болон НИТХ-ын 2016 оны сонгуулийн 37-р тойрогт нийт хэдэн сонгогч бүртгэлтэй байгаа вэ?
Манай хэсэгт нийт 2764 сонгогч бүртгэлтэй байгаа. Үүнээс 23 сонгогч өчигдөр явуулсан зөөврийн саналын хайрцгаар саналаа өгсөн.

Мөн 63-р тойргийн 1-р хэсэгт сонгууль өгөх насны хөгжлийн бэрхшээлтэй таван иргэн байгаа. Энэ жил хараагүй иргэдэд зориулсан брайль саналын хуудас ирсэн байгаа. 

ЧД-н 1-р хорооны иргэн А.Бандийн сэтгэгдлийг хуваалцлаа. 

Та хэд дэх жилдээ сонгууль өгч байна?
1952 оноос хойш өгч байна. Тэр үед бид орон нутгийн депатутаа сонгодог байлаа. Өнөөдрийг хүртэл нэг ч сонгууль алгасалгүй саналаа өгч байна даа. 

Энэ жилийн сонгуулийн бэлтгэл ажлын талаар та ямар бодолтой байна?
Ухуулга, сурталчилгаа бол номынхоо дагуу явлаа. Харин санал өгөх байрандаа ирэхэд эхлээд зөөврийн саналын хайрцгийн саналыг уншуулдаг тул цаг шахам хүлээлээ. Зөөврийн саналыг хамгийн эхэнд биш сүүлд нь уншуулж байвал зүгээр юмуу даа. Бусдаар бол хэвийн байна. 

Хүмүүст хандаж хэлэх зүйл?
Залуучуудыг саналаа өгөөрэй гэж уриалмаар байна. Хүмүүс залуучуудыг саналаа өгдөггүй гэж ярьдаг юм байна лээ. Гэхдээ би энэ ярианд итгэдэггүй. Би залуустаа итгэдэг.