Нийгмийн хариуцлагыг хэрэгжүүлэгч Мобиком Корпораци, Дэлхий Зөн Монгол ОУ-ын байгууллага болон орон нутгийн төр захиргааны байгууллагуудтай хамтран “Сумдын сургуулийн ариун цэвэр, эрүүл ахуйн нөхцөлийг сайжруулах төсөл”-ийг шинээр 8 аймгийн 13 сумдын ерөнхий боловсролын сургуулиудад хэрэгжүүлэхээр боллоо. Уг нийгмийн хариуцлагын төсөл нь 2015 оны “Нийгмийн хариуцлагын шилдэг төсөл”-өөр шалгарсан билээ.

Уг төслийн хүрээнд Архангай аймгийн Хотонт суманд барьж байгуулсан ариун цэврийн байгууламжийг сумын сургуульд хүлээлгэн өгөх арга хэмжээ 9 дүгээр сарын 3-ны өдөр зохион байгуулагдлаа. Арга хэмжээнд Боловсрол, Соёл, Шинжлэх Ухаан, Спортын Дэд сайд Ё.Отгонбаяр, Мобиком Корпорацийн Гүйцэтгэх захирал Дэвид Холлидэй, Дэлхийн зөн Монгол ОУ-ын байгууллагын төлөөлөл, мөн аймаг сумын удирдлагууд оролцлоо.

Нээлтийн үеэр Дэд сайд Ё.Отгонбаяр “Энэхүү байгууламж нь хүүхдийн эрүүл мэндэд маш чухал бөгөөд хүүхдийн суурь өвчлөлийг буруулах, ариун цэвэр, эрүүл ахуйг дээшлүүлэх онцгой ач холбогдолтой” хэмээн хэллээ.

Мобиком Корпорацийн Гүйцэтгэх захирал Дэвид Холлидэй “Мобиком Корпораци өөрийн хамтрагч байгууллагуудын хамтаар 3 жилийн хугацаанд 35 суманд энэхүү байгууламжийг барьж хүлээлгэн өгөөд байгаа бөгөөд нийт 25 мянга гаруй хүүхэд уг төслийн үр дүнг бодитоор хүртэж байгаад туйлын баяртай байна” хэмээн дурдлаа.

Уг төслийг хэрэгжүүлснээр хүүхэд багачууд гэдэсний элдэв халдварт өвчин, гепатитын халдвар авахгүй, эрүүл ахуйн шаардлага хангасан орчинд бие засах, усанд орох боломжтой болсон төдийгүй сурагчдын суралцах идэвх чармайлт нэмэгдэх, хот хөдөөгийн сурагчдын ялгааг арилгах, хөрсний бохирдлыг багасгах зэрэг олон төрлийн үр өгөөж өгсөн хэмээн орон нутгийн сургуулийн багш, ажилтнууд хэлж байсан.

Мобиком Корпораци 2014 онд өөрийн нийгмийн хариуцлагын үндсэн чиглэлийг хүүхэд хамгаалал хэмээн тодорхойлсон бөгөөд өнгөрсөн хоёр жилийн хугацаанд Дэлхий Зөн Монгол ОУ-ын байгууллага болон орон нутгийн төр захиргааны байгууллагуудтай хамтран нийт 22 суманд орчин үеийн стандарт хангасан, цэвэр усны эх үүсвэрт холбогдсон, халуун хүйтэн устай, цэвэршүүлэх септик технологи бүхий ариун цэврийн байгууламжуудыг барьж байгуулсан билээ.

2016 онд Мобиком Корпораци шинээр Баян-Өлгий аймгийн Улаанхус, Архангай аймгийн Цэнхэр, Хотонт, Өндөр-Улаан, Завхан аймгийн Идэр, Хэнтий аймгийн Баян-Адарга сум, Хурх тосгон, Дундговь аймгийн Эрдэнэдалай, Сайнцагаан, Говь-Алтай аймгийн Дэлгэр, Хөвсгөл аймгийн Мөрөн, Төв аймгийн Аргалант зэрэг 13 сумдын сургууль болон Архангай аймгийн Төвшрүүлэх сумын цэцэрлэгт хэрэгжүүлэхээр ажлаа эхлээд байна.

Энэ жил Монголын үндэсний олон нийтийн телевиз болон Рояал Кинг компани төслийн дэмжигчээр оролцож байгааг дуулгахад таатай байна.

Хүүхдүүд эрүүл, аз жаргалтай байхдаа илүү сайн сурдаг бөгөөд Мобиком болон төслийн хамтрагч байгууллагууд Монгол Улсын хойч үе болсон хүүхдүүддээ эрүүл ахуй, ариун цэврийн үндсэн шаардлага, стандартыг хангасан сурах орчныг бүрдүүлэх зорилго тавин ажиллаж байна.