Хил залгаа оршдог ОХУ-ын Буриад улсын уламжлалт шууд харилцаат Закамень аймгийн Засаг дарга В.В. Аюшеев тэргүүтэй төлөөлөгч саяхан тус аймагг зочиллоо. Буриадын Улаан-Үүд захирагч Д.В.Базаров, Закамень аймгийн Д.Д.Базаров, Ангарын мах комбинатын захирал Н.В.Колкянов нарын бүрэлдэхүүнтэй тэдгээр төлөөлөгчдийг аймгийн удирдлагууд хүлээн авч энэ жилийн хамтран ажиллах гэрээгээ эрчимтэй хэрэгжүүлэх зарим нэмэлт арга хэмжээг зохион байгуулах талаар харилцан зөвшилцлөө ..Хоёр аймгийн ахмад настангуудыг харилцан хүлээн авч байхаар Закамеийн төлөөлөгчдөөс тавьсан саналыг дэмжиж эхний ээлжинд Тэшиг сумын ахмадууд, тэдгээрийн гэр бүл үр хүүхдүүдийг харилцан зочлуулж буриад ах дүүсийн харьцааг өргөтгөх нь зүйтэй гэж үзлээ.

Мөн Бага-Илэнхийн хилийн боомт нь Засгийн газрын шийдвэрээр хилээр мал мах гаргахыг зөвшөөрсөн боомтын жагсаалтад орсон тул Булган аймгаас урьд жилийн адил тодорхой тооны мал мах авахаар Закамениас санал тавьсныг гэрээнд тусгасан юм. Энэ дагуу Б.Батсайхан, А.Лхагвасүндэв захиралтай “Хувь дэлгэрэх”, “Ажнай цэгц” компани тохиролцсон тооны үхрийг хөлөөр нь, мөн Хутаг-Өндөр суман дахь боловсруулах үйлдвэрт бэлтгэсэн махыг 11 дүгээр сарын нэгнээс өмнө гаргах ажлыг зохион байгуулах боллоо. Тийнхүү хилээр гаргах мал, маханд аймгийн мал эмнэлэг, үржлийн алба шинжилгээ хийж эрүүл ахуй, аюулгүй ажиллагааны шаардлагыг хангуулах юм байна.