Уянга ухаарлын олон дууг зүрх сэтгэлээсээ дуулж, орчин үе, үндэсний уламжлалт өнгө төрхийг дуу хөгжим, гадаад төрхөөрөө нэгэн зэрэг илтгэн харуулж чаддаг дуучин бол Дээгий буюу Т.Дэлгэрмөрөн юм.

Дуу дуулснаараа өөртөө ч, өрөөлд ч жаргал өгч чаддаг тэрээр арван жил хүлээсэн бие даасан тоглолтоо ирэх сарын 16, 17-нд Монгол бөхийн өргөөнд хийх гэж байна.   

“Дуу дуулах амар биш. Хэдийгээр сайн хоолойтой ч донжийг нь олж дуулахгүй бол хүнд хэзээ ч хүрэхгүй. Хүний сэтгэлийн утсыг хөндөж, маш нарийн нугалаа гарган, сэтгэл зүрхнээсээ дуулж ард түмэнд хүрнэ” гэж Монгол Улсын Ардын жүжигчин А.Долгор хэлжээ.   

Ирэх сарын 16-17-ний өдрүүд дуучин Т.Дэлгэрмөрөнгийн амьдралд утга учиртай өдрүүд юм байна. Эхнийх нь түүний төрсөн өдөр бол дараагийн өдөр нь бяцхан охин Д.Зөөлөнсийгийн төрсөн өдөр тохиох аж.

Ирэх сард болох тоглолтондоо Т.Дэлгэрмөрөн “Наян булгийн аялгуу”, “Тэнгэрийн бүсгүй”, “Уулзах л юмсан даа чамтайгаа”, “Хайрын дээд хань минь”, “Ааваа дуулъя”, “Андгай” зэрэг дуунуудаа дуулна.