УИХ-ын чуулганы өнөөдрийн хуралдаан эхэллээ. Өнөөдөр доорх 18 асуудлыг хэлэлцэнэ.

• Зөрчил шалган шийдвэрлэх тухай хуульд өөрчлөлт оруулах тухай хуулийн төсөл /Засгийн газар 2022.09.29-ний өдөр Төрийн хяналт шалгалтын тухай хуульд нэмэлт, өөрчлөлт оруулах тухай хуулийн төсөлтэй хамт өргөн мэдүүлсэн, эцсийн хэлэлцүүлэг/
• “Ерөнхий хяналтын сонсголын тайлан хэлэлцсэнтэй холбогдуулан авах арга хэмжээний тухай” Улсын Их Хурлын тогтоолын төсөл /эцсийн хэлэлцүүлэг/
• “Байнгын хорооны бүрэлдэхүүнд өөрчлөлт оруулах тухай” Улсын Их Хурлын тогтоолын төсөл
• “Тогтоолд нэмэлт, өөрчлөлт оруулах тухай” Улсын Их Хурлын тогтоолын төсөл /Засгийн газар 2023.01.11-ний өдөр өргөн мэдүүлсэн, хэлэлцэх эсэх/
• Ажиллах хүчний шилжилт хөдөлгөөний тухай хуульд нэмэлт, өөрчлөлт оруулах тухай хуулийн төсөл /Засгийн газар 2023.01.09-ний өдөр өргөн мэдүүлсэн, анхны хэлэлцүүлэг/
• Төмөр замын тээврийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд /Засгийн газар 2023.01.10-ны өдөр өргөн мэдүүлсэн, хэлэлцэх эсэх/
• Казиногийн тухай хуулийн төсөл болон хамт өргөн мэдүүлсэн хуулийн төслүүд /Засгийн газар 2022.12.26-ны өдөр өргөн мэдүүлсэн, хэлэлцэх эсэх/
• Бооцоот морин уралдааны тухай хуулийн төсөл болон хамт өргөн мэдүүлсэн хуулийн төслүүд /Засгийн газар 2022.12.26-ны өдөр өргөн мэдүүлсэн, хэлэлцэх эсэх/
• Бооцоот таавар, хонжворт сугалааны тухай хуулийн төсөл болон хамт өргөн мэдүүлсэн хуулийн төслүүд /Засгийн газар 2022.12.26-ны өдөр өргөн мэдүүлсэн, хэлэлцэх эсэх/
• Коронавируст халдвар /КОВИД-19/-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуулийн биелэлтийг сар тутам нээлттэйгээр хэлэлцэж, хяналт тавих шаардлагатай бол Улсын Их Хурлын холбогдох Байнгын хорооны хуралдаанаар хэлэлцүүлэх, санал, дүгнэлт гаргах үүрэг бүхий Түр хорооны ажлын дүнг танилцуулах

“Тогтоолд нэмэлт, өөрчлөлт оруулах тухай” Улсын Их Хурлын тогтоолын төсөл хэлэлцэх эсэхийг хэлэлцэж байна. Энэ үеэр УИХ-ын гишүүд дизель түлшний үнэтэй холбоотой асуудлыг салбарын сайдаас тодруулахад Уул уурхай, хүнд үйлдвэрийн сайд Ж.Ганбаатар "Дизель түлшний асуудлыг Засгийн газар маш сайн анхаарч байна. Ерөнхий сайд ОХУ-д айлчлах үеэр дизель түлшийг зах зээлийн үнээс 10 хувийн хямдралтайгаар нийлүүлэх гэрээг хийсэн. Тус гэрээг энэ сарын 1-нээс хүчин төгөлдөр мөрдөж эхэлсэн. Тодорхой үр дүнгээ өгнө гэдэгт итгэж байна. Дизель түлшийг хувийн аж ахуйн нэгжүүд нийлүүлдэг. Тиймээс дизель түлшний нийлүүлэлтийг тогтворжуулах, үнийг нэмэхгүй байх талаар уулзалт хийж байна.

ОХУ-д үүсээд буй асуудалтай холбогдуулан дизель түлшний нийлүүлэлт нэг хэсэг хомсдсон. Одоо бид сар бүр 80 мянган тонн дизель түлш авах гэрээг Роснефтьтэй байгуулсан. Өнөөдөр ч гэсэн ОХУ-ын зохих түвшний хүмүүс Монголд айлчлал хийж байна. Ерөнхий сайдтай уулзах үеэр бид дизель түлшний асуудлыг хөндөнө. Уул уурхайн яам АИ92 болон дизель түлшний асуудалд ижил хэмжээнд анхаарал тавьж байна" гэлээ.