Халгайн ач тусын талаар “Eco beauty” салоны захирал Т.Оюунжаргалын зөвлөгөөг хүргэж байна.

-Танай салоныг халгайгаар үс эмчилдэг гээд хүмүүс ам сайтай байдаг. Хэзээнээс ингэж эмчилж эхэлсэн юм бэ?
-Би 14 жил үсчнээр ажиллаж байна. Халгайн эмчилгээг 10 жилийн өмнө хүний үсэнд туршиж үзсэн юм. Би Улаанбаатарт төрсөн ч, хөдөө өссөн. Эмээ, өвөө дээрээ өссөн болохоор байгаль, ардын уламжлалтай илүү ойр өссөн л дөө. Тиймээс халгайгаар үс уналтыг зогсоох, эмчилж болдог гэдгийг эмээгээсээ сурсан. Эмээ минь ардын уламжлалт анагаах ухааны жор сайн мэддэг хүн байсан. Эмээ миний үсийг халгайн хандаар угааж өгдөг байсан юм. Тиймээс л би эрүүл өтгөн үстэй болсон хэрэг. Анх хаврын нялх халгайгаар 10 хоногийн турш нэлээд хэдэн хүний үсийг угааж үзсэн. Гэтэл нэгийнх нь үс илт ургасан байхыг нь хараад урам орсон. Одоо эмчилгээгээ улам боловсронгуй болгохыг хичээх болсон.

-Халгайг сайн гэдгийг мэддэг ч хүмүүс тэр бүр хэрэглэдэггүй. Ямар үсийг халгайгаар эмчилдэг юм бэ?
-Халгайн эмчилгээ хүний үсний гэмтлийг гайхалтай эмчилдэг. Химийн талаас нь аваад үзвэл халгайнд 44 төрлийн элемент агуулагддаг. Ялангуяа В-гийн төрлийн витаминууд, кали, кальци, фтор их хэмжээгээр агуулагддаг. Эдгээр нь үс уналтыг зогсоож, эрүүлжүүлж, сэргээдэг байгалийн бүтээгдэхүүн. Тиймээс богино хугацаанд үсийг ургуулдаг юм.

-Халгайгаа хаанаас түүх вэ. Бид хотод ургаж байгаа халгайг бохир гээд тоодоггүй шүү дээ?
-Халгай дотроо олон янз. Тухайлбал, говийнх, хангайх, говь хангайн хосолсон бүс нутгийнх, нарийн, гоёл чимэглэлийн гэх зэргээр ангилдаг. Ер нь хүний хөл хүрээгүй газраас халгайгаа түүх хэрэгтэй. Хот, суурин газрын ойролцоогоос түүвэл хөрсний бохирдол ихтэй учраас үс ургуулах биш халзална.

-Хүмүүс нялх халгайгаар хуушуур хийж иддэг. Харин танайх цай хийсэн байсан?
-Ургамлын харшилтай хүн халгайн эмчилгээнд 1-2 удаа ороод эдгэрсэн тохиолдол байдаг. Миний хувьд энэ чиглэлээр олон ажил хийхээр төлөвлөж байгаа учраас эрдэмтэн мэргэдтэйгээ хамтран судалгаа хийж халгайн цайг бий болгосон. Халгайн цай гэдэс цэвэрлэж, дотор эрхтнийг эрүүлжүүлдэг.