Монгол Улсын гарьд, гавьяат тамирчин П.Сүхбат өчигдөр зуурдаар нас баржээ.

Үндэсний бөх, чөлөөт бөхөөр хичээллэж гаргасан амжилтаар бөх сонирхогчдын хүндлэлийг хүлээж байсан тэрбээр олноо "Том" хэмээн алдаршсан.

Унасан ч, давсан ч үргэлж инээмсэглэж байдаг тэр л эгэл дүр төрх бөхөд хайртай ард түмний бодол санаанд үргэлж мөнхөд орших биз ээ.

Талийгаачийн гэр бүл, үр хүүхэд, төрөл төрөгсөд, найз нөхдөд нь гүн эмгэнэл илэрхийлье. 

Ум сайн амгалан болтугай.

Талийгаач 1964 оны наймдугаар сарын 27-нд төрсөн. Баянхонгор аймгийн Баян-Овоо сумын уугуул. 

1990 оны Токиогийн чөлөөт бөхийн дэлхийн аварга шалгаруулах тэмцээний хүрэл медаль, Барселона, Сөүлийн олимпийн шагнал IV, V байр, 1989, 1992 оны Азийн аварга шалгаруулах тэмцээний алтан медаль, 1990 оны Бээжингийн Азийн наадмын аварга цолыг хүртэж тив дэлхийд алдраа цуурайтуулж явсан билээ.

Үндэсний бөх 

• 1988 онд 6 давж улсын начин цол хүртсэн
• 1989 онд 6 давсан
• 1990 онд 7 давж улсын заан болов
• 1991 онд 8 давж үзүүрлэсэн
• 1992 онд 6 давсан
• 1993 онд 6 давсан
• 1994 онд 6 давсан
• 1997 онд 5 давж шөвгөрчээ.