Уртын дуучин Д.Жавхаасайхан, Д.Үүрийнтуяа, Б.Алтанжаргал нар хамтран” МАНДАХ НАР” тоглолтыг зохион байгуулж байна. Үндэсний урлагаа хөгжүүлэх, ардын дууны өв соёлоо түгээн дэлгэрүүлэх гэсэн чин зорилго тэднийг  нэгтгэжээ. Монголчууд  зовж, зүдэрсэн цагтаа ардын дуугаар бодлоо гийгүүлж, сэтгэлээ тайтгаруулан, найр цэнгэлээ эхлүүлдэг уламжлалтай.

Нүүдэлчдийн өв соёлоо дээдэлж, эртний бөгөөд орчин үеийн хоёр ертөнцийг нэгтгэсэн тоглолт UB Palace-ийн концертын их танхимд энэ сарын 15-нд болно.  

НАР мандаж, ертөнцөд шинэ өдөр ирдэг. Олны сэтгэл, оюунд үндэсний урлагийн нарыг мандуулахыг бэлгэдсэн  тоглолтын зохиомж, тайзны шийдэл өвөрмөц өнгө аястайгаас гадна урлагийн ертөнцөд шинэлэг санаа хэрэгжүүлж,  кино театруудын дуугаралтыг мэдрүүлэх юм байна.

МАНДАХ НАР тоглолтын дараагийн онцлог нь XX зууны эхэн үеийн Нийслэл хүрээний амьдрал, монголчуудын ахуйг харуулсан байна. Энэ тоглолтоор тэд Монголын үе үеийн уртын дуучдад хүндэтгэл үзүүлэхийг хүсжээ. Ардын дуунд өв соёл, хайр, амьдралын ухаан гүн шингэсэн байдаг. Үүнийг  тайзнаа уран сайхнаар үзүүлэхийг зорьж байна. 

Мөн үндэсний урлагийг түгээн дэлгэрүүлэхэд хувь нэмрээ  оруулж буй дуучин Д.Жавхаасайхан, Д.Үүрийнтуяа нарын АРГА БИЛЭГ, дуучин Б.Алтанжаргалын ДӨМӨН цомгоо тоглолтын босгон дээр  үзэгчдийн хүртээл болгож байна.