Баянзүрх худалдааны төвд үхрийн мах нэг кг нь 8500-11000 төг, адууны мах 8500-8800 төгрөгний үнэтэй бол хонины махыг нэг кг-ыг нь 8300 төгрөгөөр худалдаж байна. Махны худалдагч А.Отгонбаяр “Энэ жил ашиг муу байна. Худалдан авагчдын ихэнх нь тэтгэвэрийн хүмүүс байна” гэлээ. “Хар хорин” захад очиход хонины бүтэн махыг нэг кг-ыг нь 6500 төгрөгөөр худалдаж байлаа. Худалдагч н.Энхцэцэг “Цагаан сарын өмнө ч, дараа нь ч тэр ашгаа олж чадахгүй байна.

Ямаагаа самнаад эхэлчихсэн болохоор ямааны мах олдохгүй байна. Ямаа самнахаар мах нь улайчихдаг болохоор ченжүүд авдаггүй. Махны үнэ зун л хэсэг буух байхдаа” гэж ярив. Намрын махыг нөөцөлж зоорьноос гаргаж нэг кг нь 6500 төгрөгөөр худалдаалж байна. Чингэлтэй дүүргийн V хорооны иргэн А.Болдбаяр “Өвөл 100 мянган төгрөгт нэг гулууз мах авч байсан бол одоо энэ үнэ 180 орчим мянгад хүрчихлээ. Цалингийнхаа талыг маханд зарцуулж байна. Төр махны үнийн өсөлтөд хяналт тавих хэрэгтэй” гэв.

СЭЗИС-ийн Бизнесмен тэнхимийн ахлах багш эдийн засагч А.Эрхэмбаяр “Махны үнэ өссөн нь улирлын шинж чанартай. Хүмүүс ихэвчлэн намар идэшний мах гээд хавар идэх махаа эртнээс бэлдчихдэг болсон. Гэхдээ амьжиргааны түвшнээс доогуур амьдралтай хүмүүс хэрэглээний махаа тухай бүрд нь авдаг учир хүндрэлтэй. Махны наймааны хувьд “Ченж” гэдэг томоохон бүлэглэл үүсчихсэн байна.

Тиймээс нийлүүлэлт хаанаас яаж явж байгаа нь тодорхойгүй. Махны үнийг тогтвортой барихын тулд улсад стандартад нийцсэн мах боловсруулах үйлдвэр хэрэгтэй. Төр үүнийг гэрээгээр хийж болно. Бизнесийн хуулийг дагах хэдий ч хувийн хэвшил төр хоёр нэгдэж ажиллавал илүү сайн шийдэл болно” хэмээн ярив.