Францын нийслэл Парис хотноо болж буй ФАТФ-ын хурлаар Монгол Улсыг “Саарал жагсаалт”-д оруулах шийдвэр гарсан талаар зарим гишүүд мэдээлээд буй.

УИХ-ын гишүүн Б.Баттөмөр яг одоогийн байдлаар “Саарал жагсаалт”-д орсон гэсэн мэдээлэл ирээгүй гэдгийг хэлсэн юм.

Хэдийгээр “Саарал жагсаалт”-д орох нь сөрөг талтай ч төсвийн сахилга бат сул өнөөгийн нөхцөлд сайн талаас нь харвал эерэг гэж болохуйц байна гэдгийг тайлбарлалаа. 

УИХ-ын гишүүн Н.Баттөмөр “Тавьж байгаа шаардлага зөв. Муугаар бодож "Саарал жагсаалт"-д орлоо гэхэд Монголоос гарч байгаа шилжүүлэг буюу иргэн Дорж БНСУ-д байгаа хүүхдэдээ мөнгө шилжүүлэхэд удаж байж орох нь. Монголоос гарч байгаа бүх санхүүжилт хянагдана. Нөгөө талдаа төсвийн сахилга баттай болох эерэг талтай. Манайхан шиг сахилга бат султай улсуудад эерэг гэж хэлж болохуйц.

Хойд Солонгосын ажилчдыг гарга гээд байгаа. Энд ажиллаж байгаа Хойд Солонгосын иргэд 300 орчим ам.доллар л авч байгаа. 100-г нь идэж уухдаа зарцуулна, үлдсэн 200 нь Хойд Солонгост очоод цөмийн зэвсэг санхүүжүүлээд байх мөнгө биш шүү дээ.

Монгол Улс ардчилал, зах зээлийн нийгэмд шилжсэн 30 жилийн үр дүн л энэ. Бид хувийн сахилга батыг сайжруулах шаардлагатай байна. Авлига авсан хүмүүсийг шийтгэх хэрэгтэй, нэг ч хүн шийтгээгүй байна. Авлига мөнгө угаасан гэмт хэрэгт холбогдсон нэг ч хүний асуудал шийдээгүй байна шүү дээ.

Арилжааны банкуудыг дүрмийн сангаа нэм гэж байгаа юм. Энэ бол Монгол Улсын эдийн засагт хэрэгтэй. Зээлийн хүү өндөр байгаа шалтгаан нь олгож байгаа арван төгрөг тутамын ес нь хадгаламж байна. Биенээсээ өрсөөд их хүү тавьдаг. Тэгэхээр банкуудыг дүрмийн сангаа нэмж, олон нийтийн болго гэсэн санааг илэрхийлээд байгаа юм. Монголын эдийн засаг 5-6 хүний нуруун дээр тогтож байна. Эдийн засаг эмзэг, буруу шийдвэрүүдээ зогсоо л гэж байгаа юм. Арилжааны банкууд хувьцаагаа худалдаж, зээлийн эх үүсвэрээ тодорхой болгож, дүрмийн сангаа нэмэх хэрэгтэй” гэсэн юм.