Өмнөд Америк тивийн хөл бөмбөгийн аварга шалгаруулах "Copa America" тэмцээн өнөөдөр дууслаа. 47 дахь удаагийн Copa America энэ жил Бразил улсад сарын турш үргэлжилсэн бөгөөд Аргентины шигшээ баг зохион байгуулагчдыг хожин түрүүллээ.

Тивийнхээ хамгийн хүчирхэг бүрэлдэхүүнтэй хоёр баг 90 минутын турш өрсөлдөж 1-0 харьцаагаар өндөрлөв. Тоглолтын цорын ганц гоолыг Анхел Ди Мариа 22 дахь минутад оруулсан.

Аргентины шигшээ багийн ахлагч Лионел Мессигийн хувьд ийнхүү шигшээ багтайгаа хамт хоёр дахь цомоо өргөж байна. Тэрээр өмнө 2008 оны Бээжингийн олимпод түрүүлж байсан билээ.

Анх удаа тивийнхээ аварга болсон Месси Аргентины шигшээ багийг 1993 оноос хойш хүрч үзээгүй амжилтад нь авчирлаа. Энэ бол түүний болоод баг, дэмжигчдийнх нь хувьд маш үнэ цэнтэй цом юм.

Шигшээ багийнхаа хамт олон улсын тэмцээнд амжилт үзүүлдэггүй гэх шүүмжлэгчдийн үгийг Мессигийн энэхүү амжилт таглаж 2021 оны Ballon d'Or шагналыг авах нэрсийг тэргүүлж эхэллээ.

Л.Месси мөн 4 гоолтойгоор тэмцээний мэргэн бууч болсноос гадна 5 гоолын дамжуулалт өгч тэмцээний шилдэг тоглогч болсон.