Увс аймгийн дулааны цахилгаан станцад гарсан гэмтлийг засварлах ажил явагдаж байгаа. Станц засварлах ажилд 20 хүний бүрэлдэхүүнтэй ажлын хэсэг дайчлагдан ажиллаж байна.

Одоогоор К-2 зуухны үнс хаягчийн мотор шатсан байсныг засварлажээ. Мөн К-2, К-3 дугаар зуухны ул ширэм хайлж гацсан байдалтай байгаа аж.

Станцад гарсан гэмтлийн улмаас "Эрдэм оргил" ахлах сургуулийн барилгын 321, цагдаагийн газрын 57, коллежийн 78, нэгдсэн эмнэлгийн 21, Ардчиллын ордны 42, Хилийн цэргийн 0245 дугаар ангийн 24, Газрын харилцаа, хот байгуулалтын газрын 49, иргэн А.Даваадоржийн 30 ширхэг дулааны радиатор хөлдөж хагарчээ.   

Түүнчлэн аймгийн болон Улаангом сумын Засаг даргын Тамгын газар, Хот тохижилт, үйлчилгээний газар, Татварын хэлтэс, "Хас" банк, "Хадгаламж" банк, "Дун цагаан" өрхийн эмнэлэг, "Ану" худалдааны төв болон айл өрхүүдийн цэвэр усны шугам хөлдсөн байна.

Хөлдсөн шугамыг гэсгээх ажилд "Чандмань-Увс" компаниас найман хүний бүрэлдэхүүнтэй аваарын бүлэг гарч ажиллаж байгаа аж. Үүний улмаас нэлээдгүй хэмжээний хохирол учирсан байна.

Одоогоор хохирлын хэмжээг гаргаагүй байгаа ажээ. Үүссэн нөхцөл байдалтай холбогдуулан аймгийн Засаг дарга А/41 тоот захирамж гарган Улаангом сумыг өндөржүүлсэн бэлэн байдлын зэрэгт шилжүүлжээ. Өндөржүүлсэн бэлэн байдал ирэх гуравдугаар сарын 1-ний өдрийг хүртэл үргэлжлэх гэнэ.

Мөн Өмнөговь аймгийн Даланзадгад сумын дулааны цахилгаан станцад гарсан гэмтлийг засварлах ажил хэвийн хэмжээнд явагдаж байгаа аж. Эх сурвалжийн мэдээлснээр станцын I, II зуух хэвийн ажиллаж эхэлжээ. Аймгийн төвийн Нэгдсэн эмнэлэг, орон сууцны есөн байрны хөлдөлтийг бүрэн арилгасан байна.

А.Лхагважав http://www.niigmiintoli.mn/