Монголын багш нарын өдөр жилийн бүрийн хоёрдугаар сард тохиодог байсныг өөрчилж аравдугаар сарын 05-нд тэмдэглэж байхаар Засгийн газрын тогтоол гарсан. Тиймээс 2014-2015 оны хичээлийн жилд анх удаагаа Монголын багш нарын баярын өдрийг аравдугаар сарын 5-ны өдөр тэмдэглэн өнгөрүүлнэ.

Энэ жилийн Монголын багш нарын 48 дахь өдөр анх удаа аравдугаар сард болохоос гадна нийслэлийн 375 жилийн ойг тэмдэглэн өнгөрүүлэх ажлын хүрээнд хамтатган тэмдэглэх гэж байгаагаараа онцлог аж. Баярын өдрийг тохиолдуулан дараах үйл ажиллагаануудыг зохион байгуулах гэж байна.

• Хүндэтгэлийн хурал аравдугаар сарын 03-ны өдөр 14:00 цагт Монгол Бөхийн өргөөнд,
• Япон улсын Элчин сайдын яам, “Эндо Минорү” сантай хамтран   “Япон дууг хэн сайн дуулах вэ?“ уралдааныг ЕБС-ийн 13-аас дээш насны сурагчдын дунд есдүгээр сарын 27-ны өдрийн 10 цагт Монголын хүүхдийн ордонд,
   
• Нийслэлийн ерөнхий боловсролын сургуулийн багш нарын дунд 2011 оноос жил бүр уламжлал болгон зохион байгуулагдаж буй "Спорт наадам-2014 " спортын 6 төрөлт тэмцээн есдүгээр сарын 27-28-ны өдрүүдэд Монгол бөхийн өргөөнд,
   
• Ахмадын өдөр буюу аравдугаар сарын 01-ны өдөр “Ахмад багш нарын нэг өдөр”, аравдугаар сарын 06-ны өдөр “Сурагчийн нэг өдөр” сэдэвт өдөрлөгүүд ерөнхий боловсролын сургуулиуд дээр болно,
   
• Нийслэлийн 375 жилийн ойн өдөр буюу аравдугаар сарын 29-нд нийслэл, дүүргийн ИТХ-ын төлөөлөгчид ерөнхий боловсролын сургуулиудын Иргэний боловсрол хичээлийн цагаар “Улаанбаатар хотын түүх ба соёл” гэсэн сэдвээр хичээл заана,
   
• Нийслэлийн Засаг даргын санаачилгаар “Нийслэлийн ерөнхий боловсролын сургууль, цэцэрлэгийн сургалтын чанар хүртээмжийн үр дүнг индексээр дүгнэх журам”-ын дагуу шалгарсан багш нарт урамшуулал олгох үйл ажиллагаа болно (2013 онд 278 багшийг 435 сая төгрөгөөр багш нарыг урамшуулж байсан)
   
• Үндэсний соёл амралтын цэцэрлэгт хүрээлэнд “Боловсролын төгөл” байгуулах төслийн дэлгэмэл зураг, биет загвар, Landscape design шалгаруулах уралдааныг ЕБС-иудын багш, сурагчдын дунд зохион байгуулна.
   
• 22 дахь жилдээ зохион байгуулагдаж буй Монгол Улсын Хөдөлмөрийн баатар, Төрийн шагналт хөгжмийн зохиолч Дагвын Лувсаншаравын нэрэмжит “Хүүхдийн найрал дууны шилдэг хамтлаг”-ыг шалгаруулах наадмын Гала тоглолт аравдугаар сарын 29-ны өдөр болно,
   
• "Багшийн авьяасыг алдаршуулъя" урлагийн наадмыг аравдугаар сарын 03-ны өдөр МҮЭСТ-нд 12:00 цагт анх удаа зохион байгуулна, Ерөнхий боловсролын сургуулийн сурагчдын дунд нийслэлийн Засаг даргын нэрэмжит “Их нүүдэл” шатрын тэмцээнийг есдүгээр сарын 8-наас аравдугаар сарын  29-ны  өдрүүдэд 3 дахь жилдээ зохион байгуулна,
   
• Богдхан уулын ноён оргил “Цэцээ гүн”-ий чиглэлд  эрүүл агаарт идэвхтэй амралт, байгаль орчноо цэвэрлэх, боловсролын  салбарын шинэчлэлийн  олон талт асуудалд  иргэд, олон нийтийн анхаарлыг хандуулах зорилгоор есдүгээр сарын 12-оос аравдугаар сарын 02-ны өдрүүдэд багш нарын   явган аялал спортын арга хэмжээг хоёр дахь жилдээ зохион байгуулна.