Олон нийтийн санхүүгийн боловсролыг дээшлүүлэх хөтөлбөрийн хүрээнд “Санхүүгийн боловсрол” аяныг Монголбанкнаас гурван сарын хугацаатай хэрэгжүүлж байна.

Аяны эхний сарыг Дэлхийн хуримтлалын өдөрт зориулжээ.

Жил бүрийн аравдугаар сарын 31-нд энэ өдрийг улс орнууд тэмдэглэн өнгөрүүлдэг.  “Дэлхийн хуримтлалын өдөр”-ийг 1924 оноос хойш тэмдэглэхдээ иргэдийн санхүүгийн боловсролыг дээшлүүлэх зорилгоор ирээдүйдээ зориулан хуримтлал бий болгохын ач тусыг сурталчилж ирсэн байна.

Монгол улс “Дэлхийн хуримтлалын өдөр”-т нэгдэж, Үндэсний хуримтлалын өдрийг тэмдэглэдэг байхаар боллоо. Тус өдөрт зориулж улс үндэстэн бүр өөрийн ёс заншил, ахуй соёлдоо нийцсэн бэлгэдлийг Хуримтлалын өдрийн бэлгэдэл болгодог. Монгол Улс ч мөн өөрийн бэлгэ тэмдэгтэй боллоо.

Бэлгэ тэмдгээр тэмээг сонгосон нь эртний торгоны замаас өнөөг хүртэл жин тээж, эд баялаг тээвэрлэгч гэдэг утгаар мөн бие махбодийн хувьд  бөхөндөө ус нөөцөлж чаддаг, ус тэжээл ховордсон эрсдэлтэй үеийг даван туулах чадвартайг нь онцолжээ.              

Иймд ирээдүйд тохиолдож болзошгүй эрсдэлтэй нөхцөлд санхүүгийн хувьд бэлэн байх, санхүүгийн нөөц бий болгох зорилгоор хуримтлал үүсгэхийн ач тусыг тэмээгээр бэлгэдсэн байна.