Цахилгаан машиныг дугаарын хязгаарлалт, авто зам ашиглалтын төлбөр, агаарын бохирдлын хураамжаас есдүгээр сарын 1-нээс эхлэн чөлөөлөхөөр шийдвэрлэсэн юм. Нийслэлийн Засаг дарга энэ захирамжийг гаргаснаар

• Автомашины яндангаас ялгарч байгаа хорт утааг багасгах,
• Байгаль орчинд үзүүлэх сөрөг нөлөөллийг бууруулах,
• Эдийн засгийн хэмнэлттэй цахилгаан машины хэрэглээг нэмэгдүүлэхийг зорьжээ.

Нийслэлийн нийт агаарын бохирдлын 10 хувийг авто машинаас ялгардаг хорт утаа эзэлдэг байна.     

Өчигдөр дээрх шийдвэрийг танилцуулснаар манай улсад бүрэн цахилгаан машин импортолдог уу, тийм бол ямар үнэтэй байдаг, иргэдийн хамгийн өргөн хэрэглэдэг Приус авто машин энэ шийдвэрт хамаарах уу? нийслэлийн замын нөхцөлд бүрэн цахилгаан машин тохирох уу, энэ төрлийн машины цахилгааны хэрэглээ ямар байдаг вэ зэрэг олон асуулт урган гарав.

Эдгээрт хариулт авахаар Нийслэлийн Байгаль орчны газрын дарга Э.Баттулгатай ярилцлаа.

Манай улс дахь нийт тээврийн хэрэгслийн 60,9 хувь нь нийслэлд бүртгэлтэй бөгөөд 2016 оны техникийн хяналтын улсын үзлэгт орсон нийт автомашины 1,5 хувь нь утааны үзүүлэлтээр тэнцээгүй байна.

Сүүлийн гурван жилд нийслэлд бүртгэлтэй автомашины жилийн дундаж өсөлт 13.1 хувьтай байгаа  тул хорт утааны ялгарал багатай тээврийн хэрэгслийн хэрэглээг дэмжих шаардлага үүсчээ.

Дэлхийн томоохон машин үйлдвэрлэгчид бүгд цахилгаан машин үйлдвэрлэж  байгаа бөгөөд 15-20 жилийн дараа нийт үйлдвэрлэх автомашины 90% нь цахилгаан авто машин болох тухай судалгаа ч байна.