• Өмнө нь тухайн барилгыг ашиглалтад оруулахыг зөвшөөрсөн улсын комиссын гишүүд, дүгнэлтийн мэдээлэл хаалттай байсан
• Нийтийн мэдээллийн ил тод байдлын тухай хуулийн дагуу "барилга байгууламжийг ашиглалтад оруулахыг зөвшөөрсөн улсын комиссын дүгнэлт" нээлттэй болов
• Уг мэдээллийг нэгтгэн зарласнаар иргэн тухайн барилгын улсын комиссын мэдээлэлттэй танилцах боломж бүрдэнэ

Орон сууц худалдаж авах нь хүний амьдралдаа хийх хамгийн том сонголтуудын нэг. Учир нь худалдаж авсныхаа дараа буцаах, дараагийн удаад анхааръя гээд өнгөрөх боломжгүй. Залуу гэр бүлийн насан туршийн ч сонголт байж болно.

Худалдаж авах гэж буй байраа очиж үзэн боломжоороо харьцуулалт хийх боловч бодит байдал дээр чанарын асуудал нь 1-2 жил амьдарсны дараа ил болж эхэлдэг. 

Өмнө нь тухайн барилгыг ашиглалтад оруулахыг зөвшөөрсөн улсын комиссын гишүүд, дүгнэлтийн мэдээлэл хаалттай байдаг байв. Харин 2022 оны тавдугаар сарын 1-ний өдрөөс Нийтийн мэдээллийн ил тод байдлын тухай хуульд барилга байгууламжийг ашиглалтад оруулахыг зөвшөөрсөн улсын комиссын дүгнэлт нээлттэй байна хэмээн тусгасан юм.

Барилга хот байгуулалтын яамнаас зөвшөөрөл олгож баригдсан бүх барилга А даалгавар, комиссын дүгнэлттэй байдаг.

Өнгөрсөн дөрөвдүгээр сарын Засгийн газрын хуралдаанаар барилга байгууламжийг ашиглалтад оруулахыг зөвшөөрсөн улсын комиссын дүгнэлтийн мэдээллийг Цахим хөгжил, харилцаа холбооны сайдад 2023 оны зургадугаар сарын 1-ний дотор хүргүүлэхийг Засгийн газрын гишүүд, аймаг, нийслэлийн Засаг дарга, Төрийн өмчийн бодлого, зохицуулалтын газрын дарга, Засгийн газрын тусгай сангийн удирдлага, захирал нарт тус тус даалгасан.

Энэ талаар ЦХХХЯ-аас тодруулахад “Шилэн ажиллагааны хүрээнд барилгын ашиглалтад оруулах улсын комиссын дүгнэлтийн мэдээлэл зарлагдах ёстой. Одоогоор техникийн ажил буюу shilen.gov.mn-рүү машинд уншигдах тоон хэлбэрээр хөрвүүлэн бэлдэж байна. Учир нь барилгын улсын комиссын дүгнэлтүүд хуучин материал ихтэй, цаасан хэлбэрээр байгаа тул гар ажиллагаа их шаардаж байна.

Ирэх сард багтааж олон нийтэд мэдээлэхээр бэлтгэж байна. Барилга хот байгуулалтын яамнаас зөвшөөрөл олгож баригдсан бүх барилгын А даалгавар /Архитектур төлөвлөлт/ , комиссын дүгнэлттэй байдаг. Үүнд хэдэн онд, хэн гэдэг улсын байцаагч зөвшөөрөл өгч, ямар дүгнэлттэй байсан бэ, зөвшөөрлийн дагуу ашигласан эсэх мэдээлэл ил болно” гэв.

Уг мэдээллийг нэгтгэн зарласнаар иргэн тухайн барилгын улсын комиссын мэдээлэлттэй танилцах боломж бүрдэх юм.