Ам.долларын ханш өнгөрсөн долоо хоногт огцом буурлаа. Сүүлийн нэг сарын турш ханш бууралттай байна. Үүний учир шалтгааныг Монголбанкны Ерөнхийлөгчийн ахлах зөвлөх С.Болдоос тодруулахад дараах үндсэн дөрвөн шалтгааныг дурдлаа.

• Нэгдүгээрт, ам.долларын суурь эрэлт буурсан.
• Хоёрдугаарт, ам.долларын нийлүүлэлт өссөн.
• Гуравдугаарт, Оюутолгойн далд уурхайн бүтээн байгуулалт албан ёсоор эхэлснэээр ам.долларын ханш буурна гэсэн эерэг хүлээлт зах зээлд бий болсон юм.
• Дөрөвдүгээрт, энэ оны эхний дөрвөн сарын байдлаар төлбөрийн тэнцэл 200 сая ам.долларын ашигтай гарсан.

Эдгээрээс үүдэн 2000 төгрөг давсан ам.доллар 10 төгрөгөөр буурч, 1990 болов. Ханш огцом өсөх нь эрсэлтэйн сацуу огцом буурах нь ч мөн зах зээлд савлагаа үүсгэдэг.

Ам.долларын суурь эрэлт буурсан нь гадаад худалдаа буурснаас тод харагдана. Мөн

үйлдвэрлэгчид хөрөнгө оруулалт хийх, тоног төхөөрөмж худалдан авч, үйлдвэрлэлд, үйлчилгээгээ өргөжүүлэх сонирхолгүй байна.

Ам.долларын нийлүүлэлт өссөн тухайд эхний улирлын байдлаар манай улсад нийт 28 сая ам.долларын гаднын хөрөнгө оруулалт хийгээд байгаа юм. Мөн Засгийн газар гадаадаас авсан зээл, бонд зэргээ валютын захад нийлүүлсэн нь нөлөөлжээ. Хамгийн сүүлд л гэхэд Засгийн газар Австрийн Засгийн газраас 18 жилийн хугацаатай, 40 сая еврогийн зээл авсан. Энэ зээлийн дийлэнхийг томоохон эмнэлгүүдийн тоног төхөөрөмжийг шинэчлэхэд зарцуулна.

Мөн өнгөрсөн эдийн засгийн форумын үеэр Засгийн газар 500 сая ам.долларын бонд сэмхэн авсан нь тодорхой болсон юм. Сангийн сайд Б.Болор энэ мөнгийг дотоодын бондоо эргүүлэн төлөхөд ашиглана гэсэн юм. Эдгээр эх үүсвэр валютын ханшид нөлөөлж байна.