Автобусны буудал гэдэг нь автобус зогсох ёстой зогсоол юм. Харин манайд микроавтобус болон хувийн машинтай иргэд энэ зайг эзэгнэх нь элбэг.

Автобусны буудал дээр яг юу болдог вэ? Нийтийн тээврээр үйлчлүүлэхээр хүлээж буй иргэдэд автобусны буудалд багшралдан байдаг хувийн машинтай иргэд ямар төвөг учруулдаг учраас ад үзээд байна вэ? Энэ бүхний хариултыг фэйсбүүк дэх MongolBT хуудсанд нийтлэгдсэн бичлэгээс үзнэ үү.

Энэ бол бодит байдал. Тэгвэл энэ талаар Замын хөдөлгөөний дүрмийн 11-т зааснаар чиглэлийн тээврийн хэрэгслийн буудал, таксийн зогсоол дээр буюу түүнд 15 метрээс ойр зайд түр болон удаан зогсохыг хориглоно гэсэн байдаг. Мөн хууль зөрчигчийг 9600 эсвэл 19200 төгрөгөөр торгохоор заасан байдаг.

Ингэхдээ нийтийн тээврийн хэрэгслийн хөдөлгөөнд саад учруулахгүйгээр хүн буулгах, суулгахын тулд түр зогсохыг зөвшөөрдөг.

Гэтэл энэ дүрэм амьдралд хэрэгжихгүй, иргэдийг бухимдуулсан хэвээр байна.

Өнгөрсөн хоёрдугаар сард Замын цагдаагийн газар, Нийтийн тээврийн газар, Замын хөдөлгөөний удирдлагын төвтэй хамтран "Автобусны зогсоол" нэгдсэн арга хэмжээг явуулж эхэлсэн.

Гэвч замын цагдаа шалгалт хийхээс бусад үед өнөөх л автобусны буудал эзэгнэгчид нийтийн тээврээр үйлчлүүлэгсдэд саад болсон хэвээр.

Учир нь хууль зөрчигчдөд хүлээх хариуцлага бага, мөн буудал бүр дээр тэднийг хянаад зогсох цагдаагийн алба хаагч байхгүй. Тиймээс иргэн бүр автобусны буудлыг эзэгнэн зогсдог хувийн машинуудад шаардлага тавьж байя. Эргүүлээд автобусны буудлыг эзэгнэнхэн зогсдог жолооч нар ч ухамсартай баймаар байна. Заавал торгууль, шийтгэлгүйгээр ухамсартай л байцгаая л даа жолооч нар аа.