Англи хэл суралцагчид болон интернэт орчин дахь байнгын хэрэглээ болсон “Болор толь” онлайн толь бичиг тэргүүтэй бүтээгдэхүүнээр мэдээллийн технологийн салбарт танигдсан “Болорсофт” компани дараагийнхаа шинэ програмыг танилцууллаа.

Энэ нь 40 сая гаруй үгийн сан бүхий “Болор” монгол хэлний дүрмийн алдаа шалгагч шинэ програм хангамж юм.

Уг програм хангамжийг Төрийн шагналт, Монгол Улсын гавьяат багш, шинжлэх ухааны доктор, профессор Ш.Чоймаа, эх бичиг судлаач Э.Мөнх-Учрал тэргүүтэй хэлшинжлэлийн багтай хамтран бүтээсэн байна.

Үгийг үндсээр нь байршуулсан учир шинээр батлах гэж буй дүрэмд бүрэн нийцэж шинэчлэгдэх боломжтой. Мөн алдааг шалгахаас гадна хамгийн оновчтой хувилбарыг санал болгодог болохыг хэл шинжээч н.Номинтуяа хэллээ.

“Хүн бүр мэдээлэл түгээгч болсон өнөө үед монгол хэл бичгийн дүрмийн алдаа ихээхэн газар авч байна. Энэхүү асуудлыг бага боловч шийдэх үүднээс хүмүүсийн өдөр тутмын компьютерийн хэрэглээнд зориулан энэхүү програмыг зохион бүтээсэн” хэмээн тус компанийг үүсгэн байгуулагч С.Бадрал онцолсон юм.



Програмын хувьд бие даасан болон бусад програм өргөтгөн суух боломж бүхий нэмэлт гэсэн хоёр хэсэгтэй.

Мөн хувь хэрэглэгчдэд зориулсан хязгааргүй хугацаатай энгийн хувилбар болон байгууллагын хэрэглэгчдэд зориулсан хувилбартай бөгөөд шинэ хувилбар руу үнэ төлбөргүй шилждэг байна.

Энгийн хувилбар нь 45 мянга, байгууллагын хэрэглэгчийнх нэг бүр нь 39 мянган төгрөгний үнэтэй аж.

Болор v1.0 Дүрмийн алдаа шалгах програмыг Та ЭНД дарж интернэтээр худалдан авах боломжтой юм байна.

А.Сүрэн