Шинэ Дели. /Ройтер/. Пакистаны парламентын доод танхим эрх баригч Пакистаны ардын намаас нэр дэвшигч Ража Первез Ашрафыг шинэ Ерөнхий сайдаар сонгожээ.

Тэрбээр өнөөг хүртэл Усны нөөц болон эрчим хүчний сайдаар ажиллаж байв.

Пакистаны одоогийн Ерөнхий сайд Юсуф Раза Гилани Дээд шүүхийн шийдвэрээр огцрох болсон учир ерөнхий сайдыг хугацаанаас өмнө томилжээ. Өнгөрсөн долоо хоногийн мягмар гарагт Дээд шүүх Гиланиг шүүхийг хүндэтгээгүй буруутай, хууль бусаар ерөнхий сайдын албан тушаалыг хашиж байгааг тогтоосон байна.

Ерөнхийлөгч Асиф Али Зардарийн банкны дансан дахь мэдээллийг өгөхийг шаардсан албан ёсны хүсэлтийг Швейцарийн эрх баригчдад илгээ гэсэн Дээд шүүхийн тогтоолыг Гилани биелүүлээгүй буруутай болохыг дөрөвдүгээр сарын 26-нд тогтоожээ. Дансны мэдээллийг авснаар Пакистаны улс төрийн элитүүдийн хэд хэдэн төлөөлөгчийн авлигын тухай 2007 онд хаагдсан хэргийг сөхөх байв.

2007 онд Пакистаны цэргийн удирдагч, генерал Первез Мушаррафын гаргасан өршөөл үзүүлэх тухай зарлигийг Үндсэн хууль зөрчсөн гэсэн шийдвэрийг 2009 оны 12 дугаар сард тус улсын Дээд шүүх гаргажээ. Зарлигт эрүүгийн хэрэг үйлдсэн сөрөг хүчний улс төрчид болон хуучин түшмэдэд өршөөл үзүүлэхээр заасан байна. Авлигын хэрэгтэй хүмүүсийн дотор Пакистаны одоогийн Ерөнхийлөгч Асиф Али Зардари, тэрчлэн одоогийн сайд нарын танхимын хэд хэдэн гишүүн байв.

Пакистаны цэргийн удирдагч асан Мушарраф улс төрийн эвлэрэлд хүрэх алхам болохын хувиар өршөөл үзүүлэх шийдвэрийг 2007 онд гаргасан байна. Өршөөл үзүүлэх шийдвэрийг АНУ-ын зуучлалтайгаар Мушарраф болон сөрөг хүчний хооронд байгуулсан хэлэлцээрийн дүнд гаргасан бөгөөд юуны түрүүнд, тэр үеийн сөрөг хүчний удирдагч, цөлөгдсөн байсан Беназир Бхуттод өршөөл үзүүлэхэд чиглэсэн байжээ.

Уг зарлиг гарснаар алдартай олон улс төрч, тэдний дотор, Бхутто эх орондоо эргэн ирж, цэргийн эрх баригчтай байсан Пакистаныг иргэний эрх баригчтай болгох учиртай парламентын сонгуульд оролцох боломжийг нээж өгсөн байна. Харин одоо уг өршөөл одоогийн сайд нарын танхим руу дайрах шалтаг болж байгаа аж.

З.Амгалан