"Социологийн зуны сургууль" хөтөлбөрийг энэ сарын 1-10-ны өдрийг хүртэл Улаанбаатар хот болон Булган аймгийн Хутаг-Өндөр суманд зохион байгуулна. Энэ хөтөлбөрт зургаан өөр улсад  суралцаж буй салбар, салбарын 17 оюутан залуусыг сонгон шалгаруулжээ.

Уг хөтөлбөрийн хүрээнд шалгарсан оролцогчид эхний хоёр хоног Улаанбаатар хотод судалгааны арга зүйн хичээлүүдэд хамрагдаж, үлдсэн хугацаанд Хутаг-Өндөр суманд байрлаж "Сумын сургууль" сэдвийн хүрээнд багаар болон бие даан төсөл хэрэгжүүлэх аж.

Энэхүү хөтөлбөрт онцлох гурван зүйл бий. Нэгдүгээрт академик мэдлэг, судалгааны арга зүйг МУИС-ийн багш нараас шууд суралцах боломжийг олгож байна. Хоёрдугаарт, зөвхөн онол үзэх биш сурсан зүйлсээ талбарт хэрэгжүүлэх буюу Булган аймгийн Хутаг-Өндөр суманд очиж үндсэн сэдвийн хүрээнд судалгааны төсөл хэрэгжүүлнэ. Гуравдугаарт, оролцож буй оюутан залуусыг Монголын нийгмийн асуудлыг таньж мэдэх, нээн илрүүлэх чадвартай, асуудлыг бодитоор шийдвэрлэхэд оролцох эрмэлзэлтэй судлаач болгон бэлтгэх гэдгийг Нийтийн Эрх Ашгийн Сангаас онцолсон юм.

Цогц Хөгжлийн Үндэсний Төвийн гүйцэтгэх захирал М.Энхбадрал, Манай байгууллага 2023 оноос эхлэн "Социологийн хөгжлийн хөтөлбөр"-ийг санаачлан Монголд социологийн шинжлэх ухааны нийгэмд гүйцэтгэх үүргүүдийг хэрэгжүүлэх зорилгоор МУИС, ШУА-тай санамж бичиг байгуулан Нийгмийн судалгааны хүрээлэнтэй хамтран ажиллаж байна. Энэ хөтөлбөрийн хүрээнд гол зохион байгуулагдаж байгаа ажил нь "Социологийн зуны сургууль" гэлээ. 
МУИС-ийн Социологи, Нийгмийн ажлын тэнхимийн багш П.Цэрэнбазар, Социологи гэдэг мэргэжлийн талаар хүмүүс төдийлөн сайн мэддэггүй. Энэ мэргэжил нь үүсээд 200 гаруй жил болж байгаа шинэхэн мэргэжил гэж хэлж болно. Хүмүүсийн зан үйл, нийгмийн амьдрал, хүн хоорондын харилцааг бодитоор судалдаг шинжлэх ухаан юм.

Монгол улсад энэ чиглэлээр мэргэжилтэн бэлтгээд 32 жил болж байгаа учраас социологич нар цөөхөн байдаг. Нийгэмд хэрэгжүүлж байгаа бодлого үйл ажиллагаа, гаргаж байгаа шийдвэрүүд нь судалгаа дутмагийн улмаас оновчтой байж чаддаггүй. Иймд мэргэжилтнүүд нь судалгаагаа сайн таниулах, шийдвэр гаргаж байгаа хүмүүс нь тухайн судалгааг сайн ойлгож амьдрал дээр буулгаж хэрэгжүүлэх хэрэгтэй байгаа юм гэв.
Өвөр монголоос хөтөлбөрт оролцогч З.Хайрлал, Нэн тэргүүнд энэ хөтөлбөрт оролцож байгаадаа сэтгэл өндөр байна. Энэ хөтөлбөрөөр өөрийгөө илүү чадавхжуулах зорилготой байна. Мөн өөрийн судалж байгаа хөдөө орон нутгийн хөгжил, ахуй амьдрал, нийгмийн аж байдлын талаар илүү дэлгэрэнгүй жишээ, материал, судалгаатай болох байх гэж бодож байна гэсэн юм.
"Социологийн хөгжлийн хөтөлбөр"-ийн хүрээнд зуны сургуулийн төгсөгчдийг судалгааны төсөлд дадлагажуулах, төгсөгчдийн санаачилсан судалгаанд тэтгэлэг олгох зэргээр судлаачдын хөгжлийг тогтвортой дэмжин ажиллах аж. 

Л.Оюунчимэг