Дэлхийн Хэвлэлийн Гэрэл Зургийн Сан нь Нидерландын Хаант Улсын Засгийн Газартай хамтран, уур амьсгалын өөрчлөлт ба ирээдүйн талаарх үзэл бодлыг дүрсэлсэн анхны сэдэвчилсэн үзэсгэлэн болох “Хүн байгалийн хүйн холбоо” үзэсгэлэнг та бүхэнд толилуулж байна. Энэхүү үзэсгэлэнг 21-р зууны уур амьсгалын өөрчлөлттэй холбоотой үйл явдлын түүхүүдийг дэлхийн өнцөг булан бүрээс нэгтгэн хүргэгч Дэлхийн Хэвлэлийн Гэрэл Зургийн Уралдааны архивт тулгуурлан бэлтгэлээ.

Уг үзэсгэлэн нь 20 шилдэг гэрэл зургийн цомгийг багтаасан бөгөөд 1. Хямрал, 2. Дасан зохицол ба эсэргүүцэл гэх өөр хоорондоо харилцан уялдаатай уур амьсгалын өөрчлөлтийн хоёр түүхийг өгүүлнэ. Үзэсгэлэнгийн эхний хагаст нүүрс ба газрын тос олборлолт, хог хаягдал, далайн түвшний нэмэгдэлт, ой хээрийн түймэр, ган гачиг зэрэг уур амьсгалын өөрчлөлтөөс үүдэлтэй байгаль орчны сүйрлийн дүр төрхийг дэлгэсэн гэрэл зургууд багтжээ. Эдгээр зураг нь аж үйлдвэрийн үйл ажиллагааны уршгаар экосистем, орон нутгийн иргэд хэрхэн хохирч буйг харуулж, дэлхий даяар тулгарч буй эдгээр хямралыг ухаарч, хариуцлага хүлээхийг биднээс уриалж байна.

Зургийн эрх: Микеле Палазци; Кэти Орлински; Цирил Язбец.

Үзэсгэлэнгийн хоёрдугаар хагас нь итгэл найдвар ба үйлдэл рүү чиглэнэ. Энд сэргээгдэх эрчим хүчний хөгжил, шинжлэх ухаанд суурилсан хүнсний шийдлүүд, уугуул иргэдийн уламжлалт арга туршлага, газрын тос дамжуулах хоолойг эсэргүүцсэн тэмцэл зэрэг дэлхийн эмзэг тэнцвэрийг хадгалах үйлсийн төлөө тэмцэж буй хүмүүсийн дүр болон газруудыг харуулжээ. Эдгээр зургууд нь хамтын хүчин чармайлт, шинийг санаачлах чадварын хүчийг харуулж, хүмүүс бид бүтээлч байдал, сэтгэл зүрхээ ашиглан байгаль дэлхийтэй хэрхэн зохицон амьдарч болохыг харуулж байна.

Энэхүү үзэсгэлэн нь хүмүүс биднийг гүн уялдаа холбоо сүлжилдсэн дэлхий ертөнц дэх өөрсдийн байр сууриа эргэн тунгаахыг уриалж байна. Энэ нь зөвхөн байгалийн сүйрлийг эсэргүүцэх төдий биш, харин дэлхийн өнцөг булан бүрд өрнөж буй илүү тогтвортой ирээдүйг бүтээх гэсэн хүмүүсийн үйлсийг ойлгож, хүлээн зөвшөөрөхийг бидэнд сануулж буй юм.

Хүн байгалийн хүйн холбоо – Уур амьсгалын өөрчлөлт ба ирээдүй

Хугацаа: 5 дугаар сарын 16-30 -ны өдрүүдэд
Хаяг: УБ Парк (Рио Парк), Үндэсний Соёл Амралтын Хүрээлэнгийн хажууд
Ажлын цаг: 11:00 – 22:00

Үзэсгэлэнд уран бүтээлээрээ оролцож буй гэрэл зурагчид: Абриансиа Либерто, Адриана Лоурейро Фернандез, Амбер Брэкэн, Ами Витале, Ануш Бабажанян, Карстен Петер, Цирил Язбец, Даниел Бельтра, Даниел Чатард, Эдди Жим, Яспер Доест, Жонас Како, Кадир ван Лохуйзен, Кэти Орлински, Лука Локателли, Мэтью Абботт, Микеле Палазци, Сандра Мель, Симоне Трамонте.

Энэхүү үзэсгэлэнгийн талаарх мэдээлэлд зориулсан зургуудыг эндээс авах боломжтой. Зөвхөн энэхүү үзэсгэлэнгийн талаарх мэдээ, нийтлэлд ашиглана уу. Гэрэл зурагчны эрхийг заавал дурдана.

Үзэсгэлэнгийн талаар мэдээлэл авах бол Нидерландын Хаант Улсаас Монгол Улсад суух Өргөмжит Консул хатагтай Бямбасүрэнгийн Дэлгэрмаатай холбогдоно уу (delgerbyambasuren@gmail.com).

Дэлхийн Хэвлэлийн Гэрэл Зургийн Сангийн тухай

Дэлхийн Хэвлэлийн Гэрэл Зураг нь баримтат гэрэл зураг, гэрэл зурагт сэтгүүл зүйгээр дамжуулан хүмүүс хоорондын ойлголцлыг гүнзгийрүүлэх, яриа өрнүүлэх, нийгмийн үйлдэл хийхэд уриалахад чиглэсэн хараат бус, ашгийн бус байгууллага юм. 1955 онд Нидерланд Улсад байгуулагдсан тус сан жил бүр дэлхийн 80 гаруй хотод үзэсгэлэн гаргаж, олон сая хүнд хүрдэг бөгөөд цахим орчинд ч мөн олон сая үзэгчдэд хүрч ажилладаг. Бид тулгамдсан асуудлуудын дунд эргэцүүлэл хийх орон зайг хүмүүст бүрдүүлж өгөхийн зэрэгцээ гэрэл зурагт тавигдах өөрсдийн стандарт болох үнэн зөв, бодитой, гоо зүйтэй, олон өнцгөөс хандсан байх шаардлагуудыг мөрдөж ажилладаг. Мөн гэрэл зурагчдыг энэхүү стандартад хүрэхэд нь туслах, олон нийтэд хүргэх боловсролын хөтөлбөр хэрэгжүүлдэг.

Дэлгэрэнгүй мэдээллийг: www.worldpressphoto.org хаягаар авна уу. Мөн биднийг Instagram, Facebook, X, Bluesky болон YouTube хуудсаар дагаарай.
Монгол дахь Нидерландын талаарх мэдээллийг: https://www.netherlandsandyou.nl/web/mongolia/home хаягаар авна уу.
Эсвэл биднийг LinkedIn болон Facebook хуудсаар дагаарай.