Ирэх жилийнхээ загварын өнгө төрхийг тодорхойлдог “Гоёл-2013” наадам 25 дахь удаагаа амжилттай явагдаж өндөрлөлөө.

Өнгөрөгч оноос эхлэн загварын долоо хоногоор зохион байгуулагдаж эхэлсэн тус наадам энэ удаад “Mongolian grand fashion week-2013” нэрийн дор явагдаж, 15-ны өдөр гала тоглолтоо хийсэн юм.

Энэ жилийн топ моделиор “Cat walk” хамтлагийн ахлагч, Шилдэг фото модель", "Өсөх ирээдүйтэй модель" шагналуудын эзэн загвар өмсөгч О.Пүрэвдулам шалгарлаа. Тэрбээр загварын ертөнцөд хөл тавиад өдгөө найман жил болсон ба анх 2004 онд “Гоёл” наадамд оролцож байжээ. Тэрбээр МУИС-ийн олон улсын харилцааны сургуульд суралцдаг бөгөөд ирэх онд сургуулиа төгсөх гэнэ. Түүний шагналыг анхны Топ модель Э.Одгэрэл гардуулсан юм.

Наадмын шилдгүүдийг шалгаруулах мөчид Соёл, спорт, аялал жуулчлалын сайд Ц.Оюунгэрэл “Сити” дээд сургуулийн захирал Ц.Байгалмаа, дизайнер н.Батжаргал, Шилмэл загварын ордны модель сургалтын багш Х.Энхмаа нарт СТА цол олгов. Мөн

Дэд байранд
Загвар өмсөгч Туяамаа

Шилдэг эрэгтэй загвар өмсөгч
Загвар өмсөгч Ганзориг

Шилдэг эмэгтэй загвар өмсөгч
Загвар өмсөгч Ариунбилэг

Гранпри шагнал
“Аяс кашмер” компанийн дизайнер Оюунбилэг

Тусгай шагнал
“Төмөр трейд” компанийн дизайнер Бат-Эрдэнэ
“Сити” ДС-ийн “Монголжингоо” загварын товчооны дизайнер Эрдэнэтуяа
“Говь-эрдэнэ” компанийн дизайнер Болортуяа    

Шилдэг залуу дизайнер
“МузАрт Хаус”-ын дизайнер Уранзаяа, Цаст

Шилдэг дизайнер
“Мон-Үйл” компанийн дизайнер Гантуул
“Bess Tailor” загварын товчооны дизайнер Биндэръяа
“Шилмэл Загвар”  загварын товчооны дизайнер Батзаяа

Шинэ технологитой загвар нэвтрүүлсэн загварын товчоо
“Lux” компани

Шилдэг зохион бүтээх товчоо
“Амно” компани

Наадамд 50 гаруй загвар зохион бүтээгч болон “Шилмэл загвар”, “Эра”, “Монгол модель”, “Азийн модель” агентлагийн 70 гаруй загвар өмсөгчид оролцсон юм.  Мөн урилгаар ОХУ-ын загвар зохион бүтээгч, олон улсын залуу дизайнеруудын “Русский силуэт” тэмцээний ялагч  Алексей Власов загварын коллекцоо танилцууллаа.

Түүнчлэн “Харанга” хамтлагийн дуучин Лхагвасүрэн “Толин хул” дуугаа дуулж үзэгчдийг доргиосон бол  “Камертон” хамтлаг анх “Гоёл” наадамд дуулж байсан “18 нас” мөн “Хайрлая чамайгаа” дуунуудаа дуулсан юм. Харин наадмыг хааж “Хар сарнай” хамтлагийн дуучин Амараа Төрийн дууллыг өөрийн хэв маягаар дуулж наадамд өнгө нэмсэн юм.

А.Цацрал