Монгол Улсын Үндсэн Хуульд нэмэлт, өөрчлөлт орсонтой холбоотойгоор Өрсөлдөөний тухай хуулийг шинэчлэн найруулах гэж байна. Үүнтэй холбогдуулан УИХ-ын гишүүн, Инновац, цахим бодлогын байнгын хорооны дарга  Н.Учрал, тус байнгын хорооны гишүүд  Х.Ганхуяг, Г.Амартүвшин, Ц.Мөнхцэцэг нар өчигдөр Шударга өрсөлдөөн хэрэглэгчийн төлөө газрын дарга Б.Бат-Эрдэнэ болон албаны хүмүүстэй уулзаж, Өрсөлдөөний тухай хуулийн шинэчилсэн найруулгын төслийн танилцуулгыг сонсжээ.

Өрсөлдөөний тухай хууль нь 1993 онд УИХ-аар Шударга бус өрсөлдөөнийг хориглох тухай хууль нэртэй батлагдаж байжээ. Түүнээс хойш хоёр удаа нэмэлт өөрчлөлтийн хэмжээнд өөрчилж байсан бол энэ удаад шинэчилсэн найруулгын төвшинд өөрчлөх ёстой гэж ШӨХТГ болон ажлын хэсэг үзэж байгаа аж.

Шинэчлэн найруулсан хуулийн төсөл нь 5 бүлэг, 31 зүйлтэй юм байна. ШӨХТГ-аас Өрсөлдөөний тухай хуулийн шинэчилсэн найруулгын төсөлд оруулах санал сэдвээр жижиг дунд үйлдвэр эрхлэгчдийн саналыг сонсож, хэлэлцүүлэг зохион байгуулахаар болжээ.